Óvenjuleg íbúð í stórborgarstíl

Íbúðin er 212,6 fermetrar að stærð með allt að 4,5 metra lofthæð og var hönnuð og skipulögð af Steve Christer, arkitekt hjá Studio Granda. Þar á meðal sérsmíðaðar innréttingar og hillur, svo fátt eitt sé nefnt.

Í lýsingu eignarinnar á fasteignavef Vísis kemur fram að eignin er með sérinngangi, stórum þakgluggum auk yfirbyggðum og opnanlegum suður svölum. Fallegt útsýni er úr stofum yfir garð Ásmundarsafns, að Esjunni og víðar.

Íbúðin skiptist í þrjú rúmgóð svefnherbergi, tvö baðherbergi, sjónvarpsrými og bjart og glæsilegt alrými sem samanstendur af stofu og borðstofu. Þaðan er opið inn í rúmgott eldhús með eldhúskrók.

Í miðju alrýminu er stór og stæðilegur stálstigi með viðarþrepum sem leiðir upp á efri hæð íbúðarinnar.