Kærastinn fór á kostum fyrir framan Taylor Swift á hátíðardegi innherja

Chiefs vann 31-17 heimasigur á Los Angeles Chargers en þessi lið eru saman í Vesturriðli Ameríkudeildarinnar. Höfðingjarnir hafa unnið sex leiki í röð eftir tap í fyrsta leik og hafa nú þriggja sigra forskot á næsta lið riðilsins sem er Las Vegas Raiders.

Travis Kelce hélt áfram að stela athyglinni inn á vellinum á meðan kæstasta hans, Taylor Swift, var með vélarnar á sér í stúkunni.

Swift hefur verið dugleg að mæta á leiki Kelce sem virðist hafa góð áhrif á þennan magnaða innherja.

Kelce greip alls tólf bolta í gær, skoraði eitt snertimark og var alls með 179 jarda eftir sendingar frá Patrick Mahomes. Þetta var við hæfi enda var í gær „National Tight Ends Day“ eða hátíðardagur innherja.

Snertimarkið var það fimmtugasta sem Kelce skorar eftir sendingu frá Mahomes.

Taylor sást fagna tilþrifum kærastans vel með vinkonu sinni og eiginkonu Mahomes, Brittany Lynne Mahomes. Fyrir nokkrum árum spilaði Brittany einmitt fótbolta með Aftureldingu á Íslandi.

Chiefs er þó ekki eina liðið í deildinni sem er komið með sex sigra því í nótt vann Philadelphia Eagles 31-17 sigur á Miami Dolphins í uppgjöri tveggja liða með fimm sigra og eitt tap.

Baltimore Ravens sýndi líka mikinn styrk með því að enda fjögurra leikja sigurgöngu Detroit Lions með sannfærandi 38-6 sigri.

Þetta var samt dagur neðstu liðanna. New England Patriots, Chicago Bears, New York Giants og Denver Broncos unnu öll leiki sína á móti liðum sem töldust vera sterkari en þau fyrir fram. Öll þessi fjögur lið höfðu aðeins náð að vinna einn leik hvert fyrir þessa helgi.

Patriots endaði þriggja leikja taphrinu með mjög óvæntum 29-25 sigri á Buffalo Bills. Bills menn höfðu fjóra af síðustu fimm leikjum sínum og þykja líklegir til afreka á tímabilinu.

Chicago Bears vann 30-12 sigur á Las Vegas Raiders þar sem nýliðinn og leikstjórnandinn Tyson Bagent stóð sig mjög vel í fyrsta leik.

Denver Broncos vann 19-17 baráttusigur á Green Bay Packers og New York Giants liðið vann 14-7 sigur á Washington Commanders.