Heimaleikurinn til New York

Boði Logason skrifar 20. október 2023 14:17

Leikstjórar myndarinnar Logi Sigursveinsson og Smári Gunnarsson leikstjórar Heimaleiksins. Hér eru þeir sælir og glaðir með áhorfendaverðlaunin á Nordisk Panorama í september. Aðsend

Íslenska heimildarmyndin Heimaleikurinn hefur verið valin inn á Doc NYC - stærstu heimildarmyndahátíð Bandaríkjanna, sem fer fram í New York í nóvember.

Myndin mun þar keppa í flokki bestu alþjóðlegu heimildarmyndarinnar á móti níu öðrum myndum.

„Þetta er lítil íslensk mynd með stórt hjarta og fá þessar viðurkenningar á erlendri grundu er mjög mikilvægt,“ segir Smári Gunnarsson, annar leikstjóra myndarinnar.

Íslenska heimildarmyndin Heimaleikurinn hefur verið valin inn á Doc NYC - stærstu heimildarmyndahátíð Bandaríkjanna sem fram fer í New York í Nóvember. Aðsend

Hann mun ásamt, Loga Sigursveinssyni hinum leikstjóranum, ferðast til New York um miðjan nóvember og verða viðstaddir sýningu myndarinnar ásamt því að svara spurningum frá áhorfendum.

Heimaleikurinn hefur heillað áhorfendur bæði á Íslandi og erlendis á kvikmyndahátíðum síðan hún kom út í haust. Hún vann áhorfendarverðlaunin á Skjaldborgarhátíðinni í vor og einnig Áhorfendaverðlaun Nordisk Panorama í Malmö í September.

Íslenska kvennalandsliðið fékk sérstaka forsýningu á myndinni í undirbúningi fyrir síðustu leiki sína í Þjóðadeildinni og að sögn Smára voru þær í skýjunum með myndina. Myndin, sem er styrkt af Kvikmyndamiðstöð Íslands, er í sýningum í Smárabíó og Bíó Paradís en Doc NYC fer fram í New York 8. til 16. nóvember.

Heimaleikurinn er bráðfyndin mynd sem segir frá fljótfærni tilraun Kára Viðarssonar til að uppfylla draum föður síns; að safna í lið heimamanna til að spila langþráðan vígsluleik á fótboltavelli sem faðirinn lét byggja á Hellissandi 25 árum áður.

Kvikmyndagerð á Íslandi Kvikmyndahús Íslendingar erlendis