Fagnar inni­lega en spyr hvers vegna Hvalur 9 var ekki stöðvaður

„Ég fagna því að þetta skip hafi verið stöðvað. Samt auð­vitað spurði ég mig sjálfa strax að því af hverju bæði skipin hafi ekki verið stöðvuð og hef ein­hvern veginn ekki fengið skýringar á því,“ segir Val­gerður í sam­tali við frétta­stofu.

Eins og fram hefur komið tilkynnti stofnunin um tímabundna stöðvun á veiðum Hvals 8 vegna alvarlegra brota á lögum um velferð dýra við veiðar á langreyði. Stöðvunin hefur gildi þar til úrbætur hafa farið fram og verið sannreyndar af Matvælastofnun og Fiskistofu.

„En þetta eru stór tíma­mót, að MAST skuli yfir­höfuð nota þau verk­færi sem þau hafa til þess að fram­fylgja lögum um dýra­vel­ferð þannig að við fögnum því alveg inni­lega og vonum bara að þetta verði til þess að Hvalur 9 verði líka stöðvaður og að þetta verði til þess að hval­veiðar stöðvist til fram­búðar.“

Val­gerður segist fagna þessum á­fanga. Þó segist hún ekki vita hver verði næstu skref. Hún voni það besta.

Var þetta fyrir­séð?

„Nei, þetta var alls ekki fyrir­séð. Sam­kvæmt okkar fólki og þeim sem hafa lesið reglu­gerðina þá ein­mitt virtust ekki vera viður­lög við því að brjóta lög í reglu­gerðinni sem við gátum séð en greini­lega er eitt­hvað sem MAST telur sig geta gert sam­kvæmt nýrri reglu­gerð og það er bara mjög á­nægju­legt að þau séu að gera það.“