Ísland tapaði 3-1 gegn Lúxemborg á útivelli í undankeppni Evrópumótsins á næsta ári. Leikur íslenska liðisins var einn sá slakasti í langan tíma og ekki bætti úr skák að Hörður Björgvin Magnússon var rekinn af velli í síðari hálfleiknum.
Hörður Björgvin verður í leikbanni í leiknum gegn Bosníu og Hersegóvínu á mánudaginn og þar sem frekar fáir miðverðir voru í landsliðshópnum fyrir þá hefur Brynjar Ingi Bjarnason verið kallaður inn í hópinn fyrir leikinn á mánudag.
Brynjar Ingi Bjarnason hefur verið kallaður inn í hópinn hjá A landsliði karla fyrir leikinn gegn Bosníu og Hersegóvínu. pic.twitter.com/QfBBDc7s4E
— Knattspyrnusambandið (@footballiceland) September 8, 2023
Brynjar Ingi leikur með norska liðinu HamKam og á 14 A-landsleiki að baki. Guðlaugur Victor Pálsson lék í stöðu miðvarðar í kvöld og þá er varnarmaðurinn Hjörtur Hermannsson einnig í hópnum.
Leikur Íslands og Bosníu og Hersegóvínu fer fram á Laugardalsvelli á mánudaginn og hefst klukkan 18:45. Hann verður í beinni útsendingu í opinni dagskrá á Stöð 2 Sport.
