Færir úkraínskum börnum lýsi í sam­starfi við heims­meistara í boxi

„Ég er svolítið klikkaður en á góðan máta. Ég vill gera eitthvað við líf mitt, er sífellt að reyna að bæta mig og finna út hvað ég vill gera. Ég trúi á sjálfan mig og gefst aldrei upp, sama hvað gengur á. Þegar ég finn að hlutirnir eru að gerast finn ég kraft og líður mjög vel,“ segir Artem sem starfar sem barþjónn á Reykjavík Saga Hotel á Lækjargötu.

Artem er þrítugur að aldri, fæddur í höfuðborginni Kænugarði. Hann er menntaður barþjónn, sem drekkur þó ekki áfengi, og hefur starfað í Grikklandi, Eistlandi, Belgíu og Dúbaí. Hann flutti hingað til lands árið 2019.

„Mig langaði að flytja til einhvers Norðurlandanna og Ísland er meðal fallegustu landa heims, ásamt Nepal og Tíbet. Ég elska náttúruna. Mér líður eins og ég sé hluti af henni,“ segir Artem. Hann segist elska kuldann og stundar sjósund.

Borða lýsi eins og síróp

Fyrir um hálfu ári fékk Artem umboð til að selja lýsi til Úkraínu. Þá sér hann einnig um að gefa úkraínskum börnum á spítölum krakkalýsi. Fyrirtækið Lýsi og Artem vinna þetta saman með góðgerðasamtökum sem Olekander Usyk, heimsmeistari í hnefaleikum, stofnaði. Sjálfur segist Artem hafa stundað hnefaleika en aldrei sem atvinnumaður.

„Úkraínumenn elska lýsi,“ segir Artem. „Börnin sem vildu ekki bragðið af fiskiolíunni eru óð í lýsi með sítrónu og límónu og borða eins og þetta sé síróp. „Mamma og pabbi má ég fá lýsi“ segja þau.“

Vill byggja innflytjendur upp

Eftir að stríðið í Úkraínu hófst og flóttamenn byrjuðu að streyma hingað tók Artem þátt í hjólreiðamiðlun fyrir þá. Það er að útvega flóttamönnum reiðhjól til að komast leiðar sinnar.

Nú eru Artem og nokkrir Íslendingar að setja á fót góðgerðasamtök til þess að veita flóttafólki og innflytjendum ráðgjöf, Multicultural Support Center heita samtökin.

„Takmark mitt er að hjálpa fólki að aðlagast Íslandi. Að það greiði skatta og verði gagnlegt í íslensku samfélagi. Íslenskt samfélag er ekki stórt en ég vill hjálpa því að stækka,“ segir Artem.

Hann segir mikilvægt að innflytjendur skili sínu og séu ekki aðeins þiggjendur. Aðlögun og uppbygging skipti miklu máli til að gera þá að sem virkustu þjóðfélagsþegnum.

Vinir og skólasystkini á vígvellinum

Þegar Artem flutti til landsins vann hann á Fosshotel Glacier Lagoon á Öræfum. Núna þjónar hann á Reykjavík Saga Hotel á Lækjargötu.

Artem kom hingað án fjölskyldu en á fjölskyldu heima í Kænugarði. Foreldra, bróður og frændfólk. Hann segist eiga vini og skólasystkini sem séu núna á vígvellinum að berjast við innrásarher Rússa.

„Ég þekki fólk sem hefur misst fótlegg, ég þekki fólk sem hefur misst handlegg og ég þekki fólk sem hefur misst lífið í stríðinu. Þetta er mjög sárt og sýnir manni hvað lífið er hverfult,“ segir Artem.

Aðspurður um framtíðina segist hann vilja vera áfram á Íslandi, að minnsta kosti næstu árin.

„Mér líður eins og ég sé heima hjá mér. Sumir segja að manni geti aðeins liðið þannig ef maður fæðist í landinu en mér líður samt eins og ég sé heima hjá mér á Íslandi. Mér líkar vel við Íslendinga, þið eruð mjög góðhjörtuð, opin og eruð góðir vinir. Friðsamir stríðsmenn, ungir sem aldnir, ríkir og fátækir,“ segir Artem og nefnir stuðninginn sem Ísland hefur sýnt Úkraínu frá innrásinni. „Þið hafið sýnt heiminum að ykkur þykir vænt um fólkið í Úkraínu.“