Mynd­bönd: McGregor sendi lukku­dýr Miami Heat á bráðamóttöku

Denver Nuggets eru einum sigri frá NBA-meistaratitlinum eftir góðan sigur í fjórða leik liðanna á aðfaranótt laugardags. Líkt og vani er í svo stórum leikjum í NBA-deildinni þá eru ýmis skemmtiatriði milli leikhluta og í auglýsingahléum. Eitt slíkt innihélt McGregor og Burnie, lukkudýr Miami.

Atriðið virtist vera í þá átt að lukkudýrið vék sér upp að McGregor með boxhanska og vildi slást við þennan margrómaða UFC-bardagakappa. McGregor slær Burnie hins vegar í gólfið og lætur höggin dynja áður en lukkudýrið er dregið út af vellinum.

Hvort ofbeldi sé fyndið og slíkt atriði sé við hæfi á leik sem þessum verður ósagt látið en það virðist eitthvað hafa farið úr böndunum þar sem sá sem leikur Burnie endaði upp á bráðamóttöku. Fékk hann verkjalyf við sársaukanum en samkvæmt fréttum líður honum betur.

Nuggets getur unnið sinn fyrsta NBA-meistaratitil með sigri á Miami Heat í fimmta leik liðanna á aðfaranótt þriðjudags. Útsending Stöðvar 2 Sport 2 hefst á miðnætti en leikurinn sjálfur 00.30.