Vikudvöl á „versta hóteli Bretlandseyja“

Adelphi hótelið var reist í núverandi mynd árði 1914 en á reitnum hafa staðið hótel síðan á nítjándu öld. Hótelið er starfrækt í glæsilegri, friðaðri byggingu við Ranelagh-stræti í göngufjarlægð frá Eurovision-höllinni. 

Eurovísir leiðir áhorfendur í gegnum króka og kima Adelphi-hótelsins í þættinum hér fyrir neðan. Umfjöllunin er fyrsta innslag þáttarins.

Og á sínum tíma var Adelphi flottasta hótel borgarinnar, eins og heimamenn hafa ítrekað tjáð okkur. Því til staðfestingar þarf ekki annað en að renna yfir Wikipedia-síðu Adelphi; Frank Sinatra, Judy Garland og Winston Churchill gistu öll á Adelphi á gullárum starfseminnar. Glæsileikinn er enda greinilegur þegar komið er inn á hótelið í dag. Tilkomumiklir samkomusalir og kristalsljósakrónur einkenna húsakynnin, þar sem andi fyrri dýrðar svífur yfir vötnum.

En það er einmitt málið: fyrri dýrð. Hótelkeðjan Britannia keypti Adelphi árið 1983 og heimamenn virðast flestir kenna stjórnendum þar um hvernig nú er komið fyrir hótelinu. Í dag er Adelphi, fyrrum perla Liverpool, nefnilega einkum frægt fyrir að vera lítt fýsilegur dvalarstaður. 

Heilbrigðiseftirlit í Liverpool hefur ítrekað skilað kolsvörtum hreinlætisúttektum og hótelið hefur verið sektað um mörghundruð þúsund pund fyrir óásættanlega meðferð á mat. Breskir fréttamenn hafa margir gert sér sérstakar ferðir á hótelið, gist þar og afhjúpað miklar meinsemdir að dvölinni lokinni. 

Hnignun Adelphi hótelsins hefur einkum verið haldið á lofti í umfjöllunum staðarmiðilsins Liverpool Echo. Blaðamaður miðilsins gisti til að mynda á hótelinu árið 2019 og lét ekki ýkja vel af aðbúnaði þar.

Óræðar skemmdir og dúkkuhönd

Og þó að upplifun Eurovísis af Adelphi sé ekki alveg sú martröð sem margir aðrir hafa lýst er greinilegt að hið sögufræga hótel hefur verið hlunnfarið um nauðsynlegt viðhald í áraraðir. 

Í umfjöllun Eurovísis fyrir ofan er litið inn í herbergi undirritaðrar, sem reyndar var ofsalega rúmgott og tiltölulega snyrtilegt. Vaskurinn var þó kominn til ára sinna eins og sýnt er í myndskeiðinu, í loftinu voru áberandi skemmdir af óþekktum uppruna, ekkert loftljós var í herberginu og þar virkaði aðeins annar af tveimur lömpum. 

Víðast á hótelinu var svo annað hvort afgerandi hlandlykt í loftinu eða yfirþyrmandi lykt af hreinsiefni. Þá má undirrituð til með að nefna að Helena Rakel pródúsent Eurovísis fann dúkkuhönd í rúmi sínu þegar hún lagðist þar til hvílu fyrstu nóttina í Liverpool. Einkennilegt!

Leigubílstjórar Liverpool á einu máli

Hnignun Adelphi virðist enn fremur hvíla þungt á íbúum Liverpool. Hver einasti leigubílstjóri sem sótti okkur á hótelið innti okkur íbygginn eftir áliti okkar á því. Þegar við höfðum svarað því kurteislega til að hótelið mætti vissulega muna sinn fífil fegurri tók iðulega við sögustund það sem eftir lifði bílferðar.

Einn leigubílstjórinn lýsti því til að mynda yfir að hótelið væri beinlínis það versta í borginni og íbúar skömmuðust sín mjög fyrir það. Annar upplýsti okkur enn fremur um að í fyrra hefði orðið hryllilegt slys á Adelphi. Ung kona lenti undir fataskáp og lést, skelfilegt mál sem þótti undirstrika hversu djúpt hótelið væri sokkið.

Gólandi gestir og meintar afturgöngur

Þriðji leigubílstjórinn benti okkur svo á að til viðbótar við ofantalið væri ákaflega reimt á Adelphi. Við nánari eftirgrennslan reyndist það stemma, hótelið er ekki aðeins frægt fyrir óþrifnað heldur einnig meintan draugagang. Hér hafa áhugamenn um drauga ítrekað trámatíserast á vappi um gangana að næturlagi, nú síðast írskir bræður sem töldu sig hafa náð meintri afturgöngu á myndband. 

Þessu vonandi ótengt hrökk undirrituð upp eina nóttina í Eurovision-vikunni við ærandi öskur í konu úti á gangi, sem lét auk þess högg dynja á hurðum. Lætin hljóðnuðu eftir nokkra stund og eftirmálar urðu engir. Enda líklegast um að ræða drukkinn hótelgest í ógöngum, þó að atvikið hafi verið óþægilegt í meira lagi. Einkum í ljósi þeirra upplýsinga um meintan reimleika sem undirrituð hafði þá nýverið öðlast.

En hvað sem dúkkuhöndum og draugagangi líður leið okkur liðsmönnum Eurovísis hreint ágætlega þessar sjö nætur sem við gistum á Adelphi. Hótelið er vel staðsett, starfsfólkið er indælt og pissulyktin venst ágætlega. Við útilokum alls ekki að við snúum einhvern tímann aftur. Þrjár stjörnur!