Bingókúlur með hvítu súkkulaði - nýjung frá Góu

Góa 9. maí 2023 07:53

Fyrstu Bingókúlurnar sem komu á markað voru með dökku súkkulaði. Nokkrum árum síðar komu Bingókúlur með ljósu súkkulaði og nú þær nýjustu með hvíta súkkulaðinu.

Það gengur mikið á í Góu þessa dagana enda ýmsar nýjungar sem litið hafa dagsins ljós að undanförnu. Verið er að pakka fyrstu framleiðslu af nýjustu afurðinni en það eru Bingókúlur húðaðar með hvítu súkkulaði.

Mörg hafa mikið dálæti á Bingókúlum en þær eru alltaf með dásamlega góðri lakkrískaramellu og húðaðar súkkulaði. „Hvað er hægt að biðja um meira í þessu lífi?“ er nú stundum sagt í góðlátlegu gríni. Enda er ljúfa lakkrísbragðið alltaf lokkandi og með mismunandi súkkulaði utan um er leitast við að gefa súkkulaðiunnendum tækifæri til að njóta þess bragðs sem þau helst kjósa.

Fyrstu Bingókúlurnar sem komu á markað fyrir mörgum árum voru með dökku súkkulaði. Nokkrum árum síðar komu Bingókúlur með ljósu súkkulaði og núna síðast þessar nýjustu með hvíta súkkulaðinu. Þannig er reynt að uppfylla óskir neytenda sem hafa mismunandi smekk fyrir súkkulaði þó ástin á lakkrísbragðinu sameini.

Allar tegundirnar þrjár eru komnar í nýjar umbúðir, 150 gramma poka. Einhverjar sendingar af Bingókúlunum í nýju umbúðunum eru nú þegar komnar í verslanir og sjoppur og verður reynt að ljúka útkeyrslu til allra sem fyrst. Við mælum svo sannarlega með því að næla sér í allar þrjár tegundirnar.

Matur Sælgæti