Yngsti stjóri í sögu ensku úr­vals­deildarinnar

Þá var Mason einungis 29 ára gamall sem þykir ansi ungt, sérstaklega í ljósi þess að flestir atvinnumenn spila langt fram yfir þrítugsaldurinn.

Sem leikmaður á Mason að baki 69 leiki í ensku úrvalsdeildinni en þurfti að hætta einungis, 26 ára, vegna höfuðkúpubrots sem hann varð fyrir í skallaeinvígi við Gary Cahill í tapi Hull gegn Chelsea, í maí 2017. Mason sem þá var leikmaður Hull segist muna eftir öllu sem gerðist fyrir og eftir skallaeinvígið örlagaríka.

Mason þekkir vel til hjá Tottenham og leikmannahóp liðsins sömuleiðis, ásamt því að hafa verið knattspyrnustjóri félagsins hefur hann verið aðstoðarþjálfari og yfirþjálfari knattspyrnuakademíunnar. Síðast þegar Mason var stjóri Tottenham þá vann liðið fjóra leiki og tapaði þremur leikjum. Nú er hann reynslunni ríkari og vonast til að geta snúið við slæmu gengi liðsins.

„Ég hef verið nógu lengi í fótbolta til að vita að hlutirnir geta breyst mjög hratt. Ég hef trú á leikmannahóp mínum og því sem ég vil gera. Vonandi getum við fært það inn á völlinn,“ sagði Mason á blaðamannafundi fyrir leikinn í kvöld gegn Manchester United. Það er eins gott að hann breyti hlutunum til hins betra fljótt og örugglega, því Tottenham á einungis sex leiki eftir af ensku úrvalsdeildinni.