Páskaspá Siggu Kling -Vogin

Þú ert stjórnandi í eðli þínu og það er engin leið til þess að sannfæra þig um að hlaupa alltaf í einhverju hamstrahjóli því þú hefur sterkt afl og atorku til þess að slíta þig lausa úr kúgandi atferli. Þú þarft að vera í fjölbreyttu vinnuumhverfi og að anda að þér fjölbreyttu fólki.

Þar sem að tungl Vogarinnar tengist inn í Hrútsmerkið þá mun það gefa þér aukinn kraft til þess að standa með þér og koma þér í betri aðstöðu í þessum leik sem heitir lífið. Þú ert búin að lenda í vonbrigðum með ástina, það getur verið gamalt eða það getur verið nýtt, svo byrjaðu bara núna að efla ástina og að gera hana eins skemmtilega og þegar þér leið sem best. Þú skalt fyrirgefa hið gamla, þá byrjar nýr regnbogi að skína yfir þér og þú sérð ástina í nýjum litum. Þú sérð að þú ert með sterka persónu hjá þér og það eina sem þú þarft er að gera hlutverk ykkar skemmtilegri og fjölbreyttari.

Á hverjum degi sem þú vaknar áttu að þakka fyrir að vera á lífi og að eiga þennan dag og velja að gera sem mest úr honum. Ef þú hefur slitið sambandi fyrir stuttu, þá er alls ekki víst að það hafi veri rétt ákvörðun. Þessi tími núna sem er að ganga í garð lætur þig sjá að það er jafnvel eitthvað úr fortíðinni eða eitthvað sem þú hefur gert áður, allavega eitthvað sem þú þarft að endurheimta og að bæta inn í vegferðina í lífi þínu. Þú hefur valið og völdin og þú heldur á töfrasprotanum svo notaðu hann. Það versta sem þér dettur í hug þessa dagana er að vorkenna þér yfir einhverju, því það lætur þig bogna, en þú ert samt eins og bambus. Þú bognar en brotnar ekki.

Knús og kossar, Sigga Kling