Páskaspá Siggu Kling - Meyjan

Ef þér finnst þú hafir fjarlægst ástina þá er það bara þín eigin líðan sem brýtur niður líðanina og ástina. En hún er til staðar í mismunandi myndum, þetta er ekki bara tengt maka eða sambandi. Um leið og þú áttar þig á þessu sem er alveg að birtast þér, þá lagfærir þú það og það þarf ekki mikið til.

Það er svo mikið dót í kringum þig sem einhver er að færa þér eða þú hefur fengið eða færð. Farðu vel í gegnum allt það dót, því að eitthvað merkilegt er á milli hlutanna. Þetta getur meira að segja þegar verið komið.

Þér er veitt athygli vegna einhvers sem þú hefur fram að færa, eitthvað sem þú gerir mun breyta mörgu hjá persónum tengdum eða ótengdum þér. Við þetta eflist karmaorkan þín og óvæntar gjafir eða ferðalög eru fram undan. Þú getur sagt nei en ættir að nota þessa setningu „JÁ EKKERT MÁL.“

Þú ert að opna hringrásina til þess að dagar þínir séu litríkari. Það er smá flækja sem vex þér í augum, hún er tengd fortíðinni. Þú þarft að horfast í augu við hið gamla og þú hefur ekkert til að skammast þín fyrir tengt því. Margir sem eru tengdir Meyjarmerkinu fá vinninga úr happdrætti eða einhverju, en þá er líka mikilvægt að taka þátt. Það er mikið stolt yfir afkomendum eða fjölskyldunni sem stendur sig afskaplega vel í því hlutverki sem henni var gefið. Þú átt eftir að upplifa ástríðufulla hlið þína og að leyfa þér að springa út eins og blóm að vori.

Knús og kossar, Sigga Kling