Ekki komin í nýtt sam­band: „Er að slökkva elda alls staðar“

Kristján Einar Sigurbjörnsson, sem yfirleitt er kallaður Kleini, hefur hlotið mikla athygli í fjölmiðlum síðustu tvö ár bæði vegna sambands síns við söngkonuna Svölu Björgvins og vegna lögbrota. Hann sat meðal annars inni í fangelsi á Spáni í átta mánuði. 

Hafdís Björg Kristjánsdóttir er einkaþjálfari og margfaldur Íslandsmeistari í fitness. 

Fóru á rúntinn og á Nammibarinn síðustu helgi

Kleini er þessa dagana í meðferð í Krýsuvík og segir Hafdís það einnig gefa auga leið að verulega ótímabært sé að segja eitthvað til um hvernig kynni þeirra muni þróast, sérstaklega þar sem Kleini verði í meðferð næstu þrjá mánuðina. 

Hafdís segist hafa fengið skilaboð á Facebook frá blaðamanni Smartlands á mbl.is í gærkvöldi þar sem blaðamaður segist hafa frétt það að hún væri komin með kærasta. 

Ég bara svona, haha! Í alvöru? Mér datt ekki í hug að þessi manneskja hefði einhverja hugmynd um mín mál, sérstaklega þar sem við höfum ekki einu sinni ennþá farið á formlegt deit. 

Hafdís segir að þau hafi þó farið í bíltúr síðustu helgi og á Nammibarinn í Hagkaup, það sé allt og sumt.  

Sendu sameiginlega yfirlýsingu á mbl.is

Hafdís segist hafa staðfest það við blaðamanninn að hún sé að hitta einhvern en að það sé engan veginn tímabært að greina frá því þar sem aðeins nokkrir dagar eru síðan þau byrjuðu að stinga saman nefjum. 

„Þá sendir hún strax til baka nafnið Kleini og ég screenshoota og sendi á Kleina og spurði hvað við ættum að gera. Ég skil ekki hvernig svona fréttist svo hratt, ég er ekki einu sinni búin að tala við börnin mín.“ 

Hafdís og Kleini ákváðu því að skrifa yfirlýsingu saman til blaðamannsins til að koma því skýrt á framfæri að þau væru ekki formlega par og vilji því halda þessu fyrir sig meðan þau átti sig á því hvað þau vilji sjálf. 

Vildi ekki blanda börnum sínum í málin

Fréttin birtist í gærkvöldi á mbl.is og segir Hafdís ástandið í kringum sig síðan hafa verið hreina geðveiki. Sérstaklega vegna drengja sinna sem heyrðu fyrst af þessu í fjölmiðlum.

Strákarnir mínir elstu þrír lenda svakalega mikið í þessu. Ég hefði ekki viljað vera að draga strákana mína í mín sambönd fyrr en ég veit að þetta er eitthvað sem mig langar að vera í, en nú er búið að henda öllum inn í þetta. 

Viðtalið í heild sinni er hægt að nálgast í spilaranum hér fyrir neðan: 

Uppfært klukkan 15:26 

Marta María Winkel Jónasdóttir, ritstjóri Smartlands á Mbl.is, hafnar því að hafa farið með rangt mál í frétt Smartlands um Kristján Einar og Hafdísi. Hafdís hafi staðfest að hún ætti kærasta og í framhaldinu sent henni myndir af þeim til að nota með frétt.