„Fæ mér fisk í hádeginu alla daga, alltaf!“

Það má allt

Helgi hugsar almennt vel um heilsuna og byrjar daginn á því að fá sér vítamín, kaffi og próteinsjeik.

„Ég fæ mér líka jurtirnar mínar, úr Jurtaapótekinu. Ég veit ekkert hvað þetta gerir en þetta gerir eitthvað gott fyrir mig,“ segir hann og hlær. 

Hann segist þó passa sig á því að fara ekki út í neinar öfgar þegar kemur að heilsunni og mataræðinu.

Ég er ekkert anal í neinu! Það má allt, bara í hófi.

Nýlega gaf Helgi út frá sér nýtt lag sem ber nafnið, Besta útgáfan af mér, og segir hann smá kaldhæðni felast í titli lagsins.

Mér finnst þetta alltaf svolítið fyndið þegar fólk er alltaf að tala um að núna ætli það að vera besta útgáfan af sjálfum sér. Er maður ekki alltaf að reyna það? Það er enginn að reyna að vera versta útgáfan eða verri, afhverju þarf maður að vera að taka þetta fram? 

Í viðtalinu sem hægt er að nálgast í heild sinni hér fyrir neðan ræddi Helgi meðal annars um hestamennskuna, Ítalíuferðalögin og næsta viðburð sem hann verður með í svokölluðu streymi, Páska-Helgi.

Skoraði á Bergþór Pálsson í beinni 

Helgi og Bergþór Pálsson tróðu eftirminnilega upp á sínum tíma sem Strákarnir á Borginni og aðspurður hvort að einhver von sé á því að þeir muni endurtaka leikinn sendi Helgi Bergþóri bein skilaboð.

Ég skora á þig Bergþór minn, þú verður bara að koma með mér á Borgina aftur!

„Maður verður að leyfa sér að leika sér“

Ítalía er þeim hjónum Helga og Vilborgu mjög kær og sækja þau reglulega landið heim í skemmri eða lengri tíma, yfirleitt á vorin og haustin. 

Vilborg er altalandi en hún var þar í námi og hefur haldið málinu við. Hún hefur síðar verið að „guida“ bæði Ítali hérna heima og Íslendinga úti á Ítalíu.

Aðspurður um sumarplönin þetta sumarið segist Helgi einmitt vera bókaður í brúðkaup á Ítalíu og þau hjónin ætli í kjölfarið að gera sér ferð úr því. 

Sko, nú er maður kominn á þann stað í lífinu að maður verður að leyfa sér að leika sér. Ef maður hefur tækifæri til þess þá reynir maður það, svo í sumar ætla ég að vera svolítið á ferðinni. 

Þegar talið barst að hestamennskunni segir hann það alltaf einstaklega skemmtilegt að vera í kringum hesta og hestafólk. Gönguferðir um Ísland með vinum og vandamönnum ásamt hestaferðunum á sumrin séu því alltaf mikið tilhlökkunarefni.

Best að vera Í streymi

Helgi hefur marga fjöruna sopið á glæstum tónlistarferli sínum og hefur í gegnum tíðina spilað á þeim ófáum sveitaböllunum út um hvippinn og hvappinn. Hann segist þó ekki beint sakna sveitaballanna og gefur ekki mikið fyrir álit þáttarstjórnanda að það sé mikil synd að sveitaböllin séu nánast hætt. 

„Nei, mér finnst það nú ekki. Núna finnst mér bara best að vera í streymi, þá getur maður bara verið á inniskónum,“ segir Helgi og hlær. 

Talandi  um streymi þá segir Helgi einnig frá viðburðinum Páska-Helgi sem verður eins og nafnið ber til kynna á dagskrá um páskana, eða laugardagskvöldið 8. apríl.