Teitur um á­kvörðun ÍSÍ: Mesta kjafts­högg sem karfan hefur fengið síðustu ára­tugi

Ársþing Körfuknattleikssambandsins er um helgina og þar verða stór mál rædd eins og vanalega. Það eru tillögur um fjölgun liða og leikja í deildum og svo auðvitað tillögur um breytingu á útlendingareglum.

Teitur er á því að menn í hreyfingunni séu að einbeita sér að vitlausum hlutum í stað þess að sameinast um að taka á aðalmálinu.

Teitur var í Subway Tilþrifunum í gær þar sem farið var yfir leikina í 21. umferð Subway deild karla í körfubolta.

„Það er ekki bara baráttan inn á parketinu Teitur sem er á milli tannanna á fólki akkúrat núna. Það er KKÍ þing núna um helgina. Þú ert búinn að vera talsvert lengur en ég í körfuboltanum en ég man ekki eftir öðru en að umræðan þar snúist um fjölda erlendra leikmanna. Fjöldi erlendra leikmanna í hverju liði verður alltaf þrætueplið á öllum þingum. Hvar ert þú staddur í þessu máli,“ spurði Kjartan Atli Kjartansson, umsjónarmaður þáttarins og sendi boltann yfir á Teit.

Forðast þessa umræðu eins og heitan eld

„Mér finnst hún óþolandi til þess að byrja með. Ég fór einu sinni á fund þar sem þetta var rætt og það er örugglega leiðinlegasti fundur sem ég hef farið á. Þess vegna hef ég forðast þessa umræðu eins og heitan eld en maður kemst ekki hjá því eins og þú segir,“ sagði Teitur Örlygsson.

„Þetta kemur alltaf upp. Tillagan frá KKÍ gengur út á það að taka út þriggja ára regluna. Það er eina sem er gert og hvað mér við kemur þá finnst mér það óréttlátt gagnvart þessum mönnum sem hafa þessi réttindi,“ sagði Teitur.

Hafa öll réttindi nema að spila körfubolta

„Þeir eru nánast allir ef ekki allir, vinnandi menn á Íslandi. Að taka af þeim rétt finnst mér bara stórt spurningarmerki. Þeir mega gera allt á Íslandi, hafa öll réttindi nema að þeir mega ekki spila körfubolta nema þá sem takmarkandi leikmenn,“ sagði Teitur.

„Mér skilst að þessi tillaga sé frá meirihluta liðanna og hún verður því líklegast samþykkt,“ sagði Teitur.

„Tillagan er lögð fram af þriggja manna vinnunefnd sem fundaði með félögunum. Það voru einhver félög sem vildu að það yrði fækkað um einn erlendan leikmann og að ríkisfang myndi ekki skipta máli,“ sagði Kjartan Atli.

Allir að hugsa um rassgatið á sjálfum sér

„Ég skil menn sem eru pirraðir og venjulega eru allir að hugsa um rassgatið á sjálfum sér í þessu. Ég hefði bara viljað að þetta yrði fjögurra ára regla núna, fimm ára regla á næsta ári, svo sex ára og þá bara fjarar þessi regla út og er búin eftir þrjú til fjögur ár,“ sagði Teitur en þá var komið að því sem Teitur hafði mestar áhyggjur af.

„Mér finnst aðalmálið vera landsliðið okkar og hvert það stefnir. Hvert KKÍ stefnir. Það kom þessi frétt frá ÍSÍ að setja okkur niður í b-flokk sem var kannski mesta kjaftshögg sem karfan hefur síðustu áratugi,“ sagði Teitur.

Afrekssjóður ÍSÍ færði KKÍ niður um flokk sem er gríðarlegt fjárhagslegt högg fyrir sambandið og ógnar framtíð landsliðanna.

Höfum varla efni á því að senda liðið á Smáþjóðaleika

„Á sama tíma eru við með leikmann sem eru að spila í bestu deildum Evrópu og landsliðið okkar hefur aldrei litið svona vel út. Það hefur aldrei verið svona björt framtíð og við erum í risafæri um að komast inn á stórmót. Núna lítur út fyrir að við höfum varla efni á því að senda liðið okkar á Smáþjóðaleika,“ sagði Teitur hneykslaður.

„Það eru svona tíu til tólf strákar í deildinni hérna heima sem geta alveg verið atvinnumenn í Evrópu ef þeir myndi teygja sig eftir því, fá sér umboðsmann og sýna viljann. Það hafa aldrei verið jafnmargir góðir Íslendingar sem vilja vera góðir í körfubolta. Vilja vera atvinnumenn og eru farnir að æfa eins og atvinnumenn,“ sagði Teitur.

„Einhvern veginn var Njarðvík, mitt lið, eina liðið sem sendi út svona opinbera tilkynningu. Það var ekkert lið sem tók undir það. Ekki eitt lið tók undir það. Þetta er langstærsta málið,“ sagði Teitur.

Mér finnst skrifstofa KKÍ gjörsamlega máttlaus

„Frekar eru menn að funda út um allan bæ um einhverja helvítið útlendingareglu afsakið orðbragðið þegar þetta risamál vofir yfir okkur. Ég get gagnrýnt mjög marga og líka skrifstofu KKÍ. Mér finnst hún gjörsamlega máttlaus í þessum málum,“ sagði Teitur.

„Þetta finnst mér óþolandi og þetta á að vera mál númer eitt, tvö og þrjú á þessu lokaþingi,“ sagði Teitur.

Það má sjá alla eldræðu Teits hér fyrir ofan.