Aldraður leið­togi repúblikana á sjúkra­húsi

Slysið átti sér stað í kvöldverðarboði sem McConnell, sem er 81 árs gamall, var viðstaddur. Doug Andres, talsmaður þingmannsins, segir að hann hafi verið lagður inn á sjúkrahús til meðferðar, að sögn AP-fréttastofunnar.

McConnell axlarbrotnaði þegar hann féll á heimili sínu í Kentucky árið 2019. Hann hefur lýst því að hann eigi enn þann dag í dag erfitt með að ganga upp stiga eftir að hann fékk mænusótt sem barn.

Sem leiðtogi repúblikana í öldungadeildinni hefur McConnell verið einn áhrifamesti þingmaðurinn á Bandaríkjaþingi um árabil. Hann var fyrst kjörinn í deildina árið 1984 og enginn hefur leitt þingflokk þar jafn lengi og hann.

Nokkrir öldungadeildarþingmenn eru fjarri góðu gamni vegna veikinda þessa dagana. John Fetterman, þingmaður demókrata frá Pennsylvaníu, er nú í meðferð vegna þunglyndis og Dianne Feinstein, demókrati frá Kaliforníu, lagðist inn á sjúkrahús vegna ristils í síðustu viku.

Fjarvistir demókratanna tveggja hafa torveldað líf Chucks Schumer, leiðtoga öldungadeildarinnar, en demókratar eru með nauman meirihluta í deildinni og mega ekki við því að úr honum kvarnist.