Mbappe upp að hlið Edinson Cavani

Þessi 24 ára gamli sóknarmaður skoraði tvennu í öruggum 0-3 sigri á Marseille í uppgjöri toppliðanna í frönsku úrvalsdeildinni í kvöld.

Þar með er kappinn kominn með 200 mörk fyrir PSG á ferli sínum sem spannar 246 leiki en áður hafði kappinn skorað 27 mörk í 60 leikjum fyrir Monaco á táningsárum sínum.

Með mörkum sínum í kvöld komst Mbappe upp að hlið Edinson Cavani sem gerði 200 mörk fyrir PSG í 301 leik á árunum 2013-2020.

Mbappe hefur skorað 29 mörk í 29 leikjum á yfirstandandi leiktíð og óhætt að slá því föstu að hann muni eigna sér efsta sætið á listanum yfir markahæsta leikmann í sögu PSG fyrr en síðar.