Messi og Mbappe sáu um Marseille

Um var að ræða uppgjör toppliðanna en fimm stig skildu liðin að þegar kom að leik kvöldsins og því kjörið tækifæri fyrir heimamenn í Marseille að blanda sér af alvöru í baráttuna um meistaratitilinn.

Ofurstjörnurnar Lionel Messi og Kylian Mbappe voru ekki á sama máli og sáu til þess að PSG jók forystu sína á toppi deildarinnar í átta stig.

Mbappe náði forystunni fyrir gestina eftir sendingu frá Messi á 25.mínútu og fjórum mínútum síðar sá Messi um að koma boltanum yfir línuna eftir undirbúning Mbappe.

Sama uppskrift var á bak við þriðja mark leiksins en þá lagði Messi boltann fyrir Mbappe sem skoraði á 55.mínútu og náði Marseille ekki að koma til baka úr þeirri stöðu þrátt fyrir margar marktilraunir.