Völdu liðsfélaga sinn frá Íslandi besta þegar þær unnu danska bikarinn

„Þetta var alveg geggjað og mjög skemmtilegt,“ sagði Sara Ósk þegar Vísir heyrði í henni en hún spilaði með HK hér heima.

„Við erum búnar að vinna allt hingað til í vetur en lentum á móti næstbesta liðinu í undanúrslitunum. Við vorum smá stressaðar og spenntar yfir þeim leik. Við unnum þann leik 3-0 sem var mjög gaman,“ sagði Sara Ósk.

„Við mættum síðan Bröndby í úrslitaleiknum og þeim er ekki búið að ganga neitt rosalega vel í vetur. Síðustu tvo áratugi þá hafa Bröndby og Holte nánast spilað til úrslita í öllu. Bröndby var ekki búið að ganga vel en komust samt í úrslit. Fyrstu tvær hrinurnar voru mjög tæpar en svo unnum við mjög sannfærandi seinustu hrinuna,“ sagði Sara Ósk.

Liðið valdi hana besta leikmann úrslitaleiksins

Sara Ósk spilaði með DHV Odense i fyrra og varð þá í fjórða sæti í bikarnum. Nú fékk hún hins vegar að fara alla leið í úrslitaleikinn og vinna sinn fyrsta titil í Danmörku. Sara fékk ekki bara gull um hálsinn því hún fékk einnig mikið hrós frá liðsfélögum sínum.

„Liðið velur alltaf saman mann leiksins og ég var valin maður leiksins af liðinu. Uppspilarinn okkar var síðan valin besti leikmaður mótsins,“ sagði Sara Ósk.

Hún hefur greinilega stimplað sig vel inn í liðið og er mikilvægur leikmaður í augum liðsfélaga sinna sem voru alveg tilbúin að láta íslensku stelpunum fá heiðurinn.

„Það var mjög skemmtilegt því ég er í raun ekki byrjunarliðsleikmaður og það var því mjög gaman að fá að koma inn á og ná að gera góða hluti. Ég var óvenjulega ekki stressuð og var meira spennt og glöð. Ég náði því að spila frjálst án þess að vera neitt stressuð,“ sagði Sara og hún er ánægð með verðlaunin.

„Ég var ekki að búast við þessu. Ég hef bara unnið tvo bikara því ég vann einu sinni á Íslandi. Þegar ég spilaði á Íslandi þá var ég líka valinn maður leiksins í úrslitaleiknum,“ sagði Sara og titlarnir auðvitað enn eftirminnilegri fyrir vikið.

Er tæknilega séð ekki atvinnumaður

Hún fór til Danmerkur á síðasta ári til að spila blak en skipti síðan um lið. „Ég ákvað í ágúst að færa mig yfir í þetta lið. Ég sótti þá um skóla og komst inn en ákvað að byrja ekki strax. Ég ætla að byrja eftir næsta sumarið í skóla,“ sagði Sara en hún vill þó ekki kalla sig atvinnumann.

„Ég er tæknilega séð ekki atvinnumaður en fæ samt alveg smá borgað fyrir þetta. Ég myndi meira kalla þetta áhugamál en þetta er nánast á atvinnumannastigi því við æfum það mikið. Ég eyði eiginlega öllum tímanum mínum í þetta,“ sagði Sara.

Sendi þjálfaranum tölvupóst

Sara fannst hún þurfa meiri áskorun eftir tímabilið með DHV Odense. Hún sendi þjálfaranum hjá Holte tölvupóst og hann vildi endilega fá hana til Holte.

„Þær voru bara með tvær miðjur í því liði og ég spila miðju. Hann sagði að hann vantaði mjög mikið aðra miðju en nú eru við orðnar fjórar. Það er því mjög mikil samkeppni um að fá að spila. Þú þarft því að leggja mjög mikið á þig á æfingum til að sýna að þú eigir að fá spilatíma,“ sagði Sara.

Hún segist hafa bætt sig mikið eftir að hún kom til Danmerkur.

„Sérstaklega eftir að ég kom í Holte. Ég er með rosalega góðan þjálfara sem er landsliðsþjálfarinn hérna í Danmörku. Hann hefur verið að þjálfa þetta lið í mjög mörg ár. Ég finn alveg svakalegan mun á mér eftir að ég kom í Holte og er alveg á fullu að bæta mig,“ sagði Sara.

Létt og skemmtileg á Tik Tok

Holte leyfir sér aðeins að skjóta á íslensku landsliðskonuna á samfélagsmiðlum en er hún Tik Tok drottning liðsins?

„Nei ekki alveg en ég er dugleg þar inn á,“ svarar Sara hlæjandi og segist alveg vera tilbúin að gera grín af sjálfri sér og öðrum til að létta andann meðal liðsfélaga sinna.

Hún er sögð vera SOS á samfélagsmiðlum félagsins. „Ég er aldrei kölluð það en þeim finnst það mjög fyndið að skammstöfunin mín sé SOS líka af því ég stundum svolítið utan við mig,“ svarar Sara í léttum tón.

Sara segist eiginlega vera hissa á því hversu vel hópurinn hefur náð saman. „Í byrjun tímabilsins þá hættu nokkrar í þessu liði og það komu mjög margar nýjar. Við erum því með mjög nýtt lið og mjög margar sem hafa ekki spilað saman. Við náum ógeðslega vel saman og það geta allir talað við alla,“ sagði Sara.

„Við erum líka heppnar með það að stór hluti liðsins er í danska landsliðinu og þær þekkjast því vel frá því. Ég á síðan auðvelt með að eignast vini og komst fljótt inn í hópinn. Ég átti ekki auðvelt með dönskuna fyrst en ég get talað hana reiprennandi núna,“ sagði Sara.

Býr í miðbænum

Sara býr í miðbænum en Holte er norðarlega á Kaupmannahafnarsvæðinu. Það tekur hana því ágætis tíma að fara á æfingar. „Holte er fyrir ofan miðbæinn en ég bý aðeins fyrir neðan hann. Það tekur mig því alveg 45 mínútur til klukkutíma að fara á æfingu. Allt liðið býr í miðbænum enda viljum við búa nær bænum því við erum allar ungar og margar í skóla. Það er voðalega lítið að gerast þarna upp í Holte nema bara æfingar,“ sagði Sara.

Sara segist hafa æft mjög margar íþróttir á sínum yngri árum. „Ég prófaði nánast allar íþróttir þegar ég var yngri og fann mig ekki í neinu. Síðan var mamma mín og systir mín báðar í blaki. Ég byrjaði í blaki á milli tíu og tólf ára aldurs og hef bara verið þar síðan,“ sagði Sara.

Komust langt í Evrópukeppninni

Þetta er búinn að vera ævintýravetur fyrir Söru og liðsfélaga hennar því þær voru líka að spila í Evrópukeppni á þessu tímabili.

„Við komust í sextán liða úrslit í Áskorunarkeppni Evrópu sem er í fyrsta sinn í sögu Holte og Danmerkur sem blaklið hefur komist svo langt. Við duttum út þar í janúar en vorum í raun ekkert svekktar með það því við stóðum okkur rosalega vel,“ sagði Sara.

„Vegna þess þá vorum við smá stressaðar fyrir bikarúrslitunum því það er búin að vera rosalega mikil umfjöllun um okkar. Það voru allir að búast við svo ótrúlega miklu af okkur. Við tölum mikið um það fyrir bikarúrslitahelgina að sýna fólki að við getum haldið áfram að spila vel. Ég held að framhaldið sé mjög jákvætt,“ sagði Sara.

„Það getur allt gerst en við erum í góðri stöðu eins og staðan er núna,“ sagði Sara.

Holte varð í öðru sæti í öllum keppnum í fyrra og er því þegar búið að gera betur eftir komu íslensku landsliðskonunnar.