„Auðvitað er það missir“

Sara Björk var landsliðsfyrirliði um árabil og er leikjahæst í sögu landsliðsins með 139 landsleiki. Þorsteinn Halldórsson, landsliðsþjálfari, segir að hennar verði saknað.

„Þú þarft ekki annað en að skoða hennar prófíl sem knattspyrnukona undanfarin tíu ár til að sjá að það sem hún hefur gert úti og með landsliðinu er gríðarlega mikið. Hún gefur liðinu mikið sem einstaklingur bæði innan og utan vallar,“

„Auðvitað er það missir að missa konu á þessu leveli úr liðinu. En þetta er bara gangur fótbolta. Lífaldur knattsyrnukvenna er ekkert rosalega hár. Þetta er bara eitthvað sem við tökumst á við, vinnum út frá og gerum það bara vonandi vel,“ segir Þorsteinn.

Þá gefst líklega tækifæri fyrir aðrar til að stíga upp?

„Já, er það ekki alltaf. Það er bara næsti leikmaður sem spilar og ég hef enga trú á öðru en að við leysum þetta og gerum það vel.“ segir Þorsteinn.

Ísland spilar við Skotland, Wales og Filippseyjar á Pinatar Cup á Spáni síðar í mánuðinum en um er að ræða fyrsta verkefnið eftir að Sara Björk lagði skóna á hilluna. Miðvörðurinn Glódís Perla Viggósdóttir, sem leikur með Bayern Munchen, tekur við bandinu, en hún hefur borið það síðustu ár þegar Sara hefur verið fjarverandi.

„Við áttum spjall saman í byrjun árs. Ég tilkynnti þetta og við fórum yfir þetta. Hún veit af þessu og þetta er ekkert nýtt, þannig séð, fyrir hana,“

„Hún er búin að vera varafyrirliði hjá mér síðan ég byrjaði og ég hef enga trú á öðru en að hún muni gera þetta og halda áfram að spila vel fyrir okkur á sama tíma,“ segir Þorsteinn.

Viðtalið má sjá í spilaranum að ofan.