Um­deildur leigu­sali selur fjögur hundruð fer­metra höll á Arnar­nesinu

Húsið var byggt árið 1964 en hefur verið bæði stækkað og endurnýjað að miklu leyti. Breytingar á húsinu voru hannaðar af Helga Hjálmarssyni arkítekt og Rut Káradóttur innanhúshönnuði. Við breytingarnar var lögð áhersla á að varðveita upprunalegan byggingarstíl að utan og í stofum hússins. Þá var jafnframt lögð áhersla á einfaldleika og endingargóð efni sem þola mikla umgengi.

Húsið skiptist í fjögur aðalrými; sameiginlegt rými, hjónasvítu, herbergjaálmu og tómstundarherbergi/bílskúr. Í sameiginlega rýminu er að finna eldhús, borðstofu, neðri stofu, efri stofu, gestasalerni og aðal anddyri hússins.

Sextíu fermetra lúxus hjónasvíta

Hjónasvítan er hvorki meira né minna en sextíu fermetrar. Innan af henni er sjónvarpsherbergi, svefnherbergi, fataherbergi og baðherbergi þar sem útgengt er að heitum potti. Frá pottinum er stutt að fara niður í fjöru þar sem hægt er að skella sér í sjósund.

Sérinngangur er að herbergjaálmunni en þar eru fjögur svefnherbergi og rúmgott baðherbergi.

Eignin stendur á 1800 fermetra lóð með óskertu sjávarútsýni sem og útsýni til Snæfellsjökuls. Óskað er eftir tilboði í húsið en fasteignamat er 208 milljónir. 

Eigandi hússins er Stefán Kjærnested. Stefán var áberandi í fjölmiðlum fyrir nokkrum árum þegar í ljós kom að hann leigði út iðnaðarhúsnæði til einstaklinga sem áttu erfitt með að fóta sig á leigumarkaði. Þar bjuggu meðal annars fíklar og einstaklingar á sakaskrá. Fjallað var um málið í þáttunum Brestir á sínum tíma. DV fjallaði árið 2017 um útleigu Stefáns og föður hans á herbergjum til verkamanna og fólks sem minna má sín.

Hér að neðan má sjá myndir af húsinu en nánari upplýsingar um eignina er hægt að finna á fasteignavef Vísis.