Jólamolar Vísis munu birtast reglulega fram að jólum. Þar fáum við að kynnast þjóðþekktum einstaklingum í nýju ljósi og komast að því hvað það er sem kemur þeim í jólagírinn. Jólamolunum er ekki síður ætlað að koma lesendum Vísis í hið eina sanna hátíðarskap.
Hvort myndirðu skilgreina þig sem Elf eða The Grinch?
„Ég á ekkert nema hamingjuríkar minningar af jólunum sem barn en svo í seinni tíð og á fullorðinsárum fór þetta óvart að snúast meira um að hafa allt fullkomið og ofhugsa allt frekar en að njóta. Svo ég er algjörlega Grinch. Því jólaandinn helltist ekki yfir hann fyrr en korteri í jól. Finnst jólin stressandi þar til svona 18:10 á aðfangadag. Umkringd fólkinu mínu og allt í einu þá byrja jólalögin að „meika sens“.“
Hver er þín uppáhalds jólaminning?
„Ég held það sé einhver samblanda af því að vera lítil og leika mér undir flyglinum hjá ömmu og afa með legó sem ég fékk í jólagjöf og fara út á sleða með pabba og systrum mínum. Svo notuðum við systurnar alltaf jólin sem afsökun til að búa til risastóra flatsæng í herberginu mínu. Litlu systur mínar svo gott sem fluttu inn til mín yfir jólin og við lásum jólabækurnar fram á nótt, borðuðum óhóflega mikinn reyktan lax á ristað brauð og heita súkkulaðið hennar mömmu. Við gerðum þetta fram á fullorðins ár. En þá reyndar ekki alveg yfir öll jólin. Meira eina nótt að gamni haha.“
Hver er eftirminnilegasta jólagjöf sem þú hefur fengið?
„Það er annars vegar risa stórt Polly Pocket box og Belville lego íbúð.“
Hver er versta jólagjöf sem þú hefur fengið?
„Ég get ekki sagt frá því. Það myndi særa manneskjuna sem gaf mér hana!“
Hvert er þitt uppáhalds jólalag?
„River eftir Joni Mitchell.“
Hver er þín uppáhalds jólamynd?
„Ég horfi alltaf á Harry Potter myndirnar um jólin. Þær eru alls ekkert endilega jólamyndir en ég elska að horfa á þær aftur.“
Hvað borðar þú á aðfangadag?
„Þetta eru sjöttu jólin mín sem grænkeri og hefur það verið Wellington eða aðrir fallegir réttir. Uppáhalds jólamaturinn var þegar Friðrik vinur minn, listakokkur og eiginmaður bestu vinkonu minni Rakelar Evu, gaf mér besta innbakaða grænmeti lífs míns. Allt gert frá grunni, skreytt og svo fallegt og bragðgott. Í ár ætla ég ekkert að flækja þetta og hugsa að ég kaupi jólakörfu letidýrsins frá Ellu Stínu.“
Hvers óskar þú þér í jólagjöf í ár?
„Ég er engin gjafakona. Finnst gjafir alltaf smá bruðl.. Ég er Grinch ekki gleyma haha. En ég er að plana hittinga, dekurdaga, jólakaffi og knús í staðinn fyrir pakka. Upplifun frekar en pakka.“
Hvað er það sem hringir inn jólin fyrir þér?
„Bókstaflega jólaklukkurnar kl 18:00. Það er nostalgía á öðru leveli þegar þær byrja í útvarpinu.“
Er eitthvað skemmtilegt á döfinni hjá þér núna fyrir jólin?
„Ég var að klára smá törn að undirbúa tvenna tónleika í Sundhöll Hafnarfjarðar sem voru núna um helgina. Það var svo dásamlega skemmtilegt að ég er strax farin að spá hvernig ég ætla gera þetta aftur á næsta ári.
Síðan strax eftir jól hefst undirbúningur fyrir Eyja tónleikana í Hörpu þann 21. janúar, sem heita líka eftir laginu mínu Eyjanótt. Ég hlakka til að syngja í fyrsta skipti a sviðinu í Hörpu. Mér þykir afskaplega vænt um Eyjafólk og hlakka mikið til að syngja fyrir þau og þau vonandi með mér
