María aftur með eftir versta símtal ævinnar

María fór ekki leynt með vonbrigði sín eftir að Riise valdi hana ekki í landsliðið í haust. „Það er ekkert launungarmál að þetta er versta símtal sem ég hef átt,“ sagði María á þeim tíma við TV 2 og bætti við:

„Ég er ótrúlega svekkt og þetta er afskaplega sárt. Það hefur ofboðslega mikla þýðingu fyrir mig að spila fyrir Noreg og ég vil meina að ég hafi eitthvað fram að færa fyrir landsliðið.“

Riise er greinilega sammála því að María hafi eitthvað fram að færa því María og Emilie Haavi koma nú inn í norska hópinn og verða með á Spáni í nóvember. Þar mætir Noregur Frakklandi og Noregi í vináttulandsleikjum, til undirbúnings fyrir heimsmeistaramótið næsta sumar.

„Hún [María] hefur spilað síðustu leiki fyrir Manchester United. Haavi hefur skilað sínu fyrir Roma um nokkurt skeið,“ sagði Riise þegar hún útskýrði valið sitt.

María hefur verið í byrjunarliði United í síðustu þremur leikjum og liðið er á toppi ensku úrvalsdeildarinnar með fullt hús stiga eftir fimm leiki.

María var ekki valin í leiki gegn Belgíu og Albaníu í undankeppni HM í byrjun september, né heldur í vináttulandsleikina við Brasilíu og Holland í október, þegar Noregur tapaði 4-1 gegn Brasilíu en vann góðan sigur gegn Hollandi, 2-0.

Fyrirliðinn Maren Mjelde, Ada Hegerberg og Caroline Graham Hansen eru ekki í norska hópnum en þær glíma allar við meiðsli auk þess sem Hansen hefur tekið sér hlé frá landsliðinu vegna hjartavandamála.