„Í rauninni erum við bara rændar þessu“

Dómarinn Stéphanie Frappart frá Frakklandi tók umdeildar ákvarðanir sem höfðu mikið að segja. Hún dæmdi mark af Íslandi snemma í síðari hálfleik og gaf Áslaugu Mundu Gunnlaugsdóttur rautt spjald þegar hún gaf Portúgal vítaspyrnu skömmu seinna.

„Í rauninni erum við bara rændar þessu. Ég er ekki búinn að sjá þetta víti en það eru allir sem segja að þetta var tæpt víti og aldrei rautt spjald. Mér finnst þetta bara hafa verið illa dæmdur leikur frá A til Ö og það er bara skammarlegt sú sem á að vera að einn besti kvendómarinn geri svona mörg mistök og þurfi að fara svona oft í skjáinn í einum leik. Þetta er bara skammarlegt og léleg lína,“ segir Glódís Perla.

„Ég næ þessu ekki. Ég hélt það væri búið að taka burt tvöfalda refsingu og þú gætir ekki fengið víti og rautt spjald í sama atvikinu. Þetta er skrýtið, ég hélt hún væri með meiri reynslu og meiri tök á stórum leikjum heldur en þetta. Þetta er bara gríðarlega svekkjandi,“

„Hún tekur mark af okkur sem mér finnst ósanngjarnt og bara í ljósi leiksins. Þær fá allt með sér en við ekki neitt,“ segir Glódís.

Glódís Perla segir þá uppsetninguna á umspilinu hafa verið furðulega. Ísland hafi mátt fá heimaleik sem lið í efri styrkleikaflokki. Dregið var hins vegar um hvar leikurinn yrði og Ísland þurfti því að bíða fram á síðustu stundu eftir því að vita hvort liðið færi til Portúgal eða Belgíu þar sem þau lið mættust fyrir nokkrum dögum.

„Það er gríðarlega svekkjandi að það hafi í raun ekki gefið okkur neitt að vera næst besta annað sætið af því að við drögumst á útivöll, vitum ekki hvert við erum að fara og við hvern við eigum að spila. Þetta er skrýtið upp sett hjá UEFA og eiginlega öll liðin sem voru í efri styrkleikaflokki fengu útileik,“

Verður erfitt að horfa á HM næsta sumar

Glódís segir þá að liðið verði að læra af reynslunni og draumurinn um HM-sæti lifi. Það verði að bíða til 2027. Erfitt verði þá að horfa á HM næsta sumar, verandi ekki á staðnum.

„Við lærum af þessu, ekki á morgun og ekki eftir mánuð. Þetta mun liggja í manni lengi held ég. En við munum vonandi taka þessa reynslu með okkur og verðum að gera enn betur í næstu undankeppni,“

„Þetta er ennþá stór draumur hjá okkur öllum. Það hefði verið ótrúlega gaman að gera þetta í dag og vera á leiðinni til Ástralíu næsta sumar. Ég var einhvern veginn ekki búin að sjá neitt annað fyrir mér. Ég var að fara til Ástralíu næsta sumar. Þetta er gríðarlega sárt og það verður erfitt að horfa á mótið næsta sumar,“ segir Glódís.