Að minnsta kosti 41 látinn eftir kirkjubruna í Kairó

Abu Sefein kirkja er staðsett í þröngri götu í Imbaba-hverfi, einu fjölmennasta hverfi Giza-borgar sem er á stórhöfuðborgarsvæði Kairó, og var hún troðfull af fólki þegar eldur kviknaði í morgunmessu klukkan níu að staðartíma í morgun. 

Að sögn innanríkisráðuneytis Egyptalands er talið að eldurinn hafi kviknað út frá skammhlaupi í loftræstingarkerfi kirkjunnar.

Þá segir einnig í tilkynningu ráðuneytisins að flestir hinna látnu hafi látist vegna reykeitrunar eftir að þeir festust inni í kirkjunni. Einnig reyndi fjöldi fólks að hoppa af efri hæðum kirkjunnar til að komast undan eldinum.

Bruninn er einn sá mannskæðasti í Egyptalandi í fjölda ára.