Svein­dís Jane best en Gló­dís Perla og Karó­lína Lea ekki langt undan

Fyrri hálfleikur var stál í stál en íslenska liðið var þó alltaf með yfirhöndina. Það mátti snemma sjá að bæði lið ætluðu að selja sig dýrt og fyrri hálfleikur eftir því. Íslenska liðið var þó sterkara og fékk vítaspyrnu eftir rúman hálftíma eftir að boltinn fór í hönd varnarmanns Belgíu.

Berglind Björg Þorvaldsdóttir fór á punktinn en Nicky Evrard, markvörður Belgíu las hana eins og opna bók. Berglind Björg átti þó eftir að bæta upp fyrir klúðrið en staðan var markalaus er flautað var til hálfleiks. 

Í þeim síðari fór Karólína Lea einkar illa með varnarmann belgíska liðsins áður en hún gaf frábæra sendingu yfir á fjærstöngina þar sem refurinn Berglind Björg og skallaði boltann í netið. Staðan orðin 1-0 og Ísland með öll völd á vellinum. 

Gunnhildur Yrsa Jónsdóttir braut klaufalega af sér innan vítateigs þegar 25 mínútur lifðu leiks. Justine Vanhaevermaet skoraði af miklu öryggi og staðan 1-1. Eftir það átti Belgía sinn besta kafla í leiknum en íslenska vörnin stóðst áhlaupið og ógnaði verulega undir lok leiks. 

Það var hins vegar of lítið of seint og því lauk leiknum með 1-1 jafntefli. Einkannir íslenska liðsins má sjá hér að neðan.

Byrjunarlið 

Sandra Sigurðardóttir, markvörður 8

Lítið að gera framan af hennar fyrsta leik á stórmóti en var mjög örugg í öllum sínum aðgerðum. Fór í rangt horn í vítaspyrnunni en það er ekki hægt að gagnrýna markvörð fyrir það. Varði mjög vel undir lok leiks þegar Tessa Wullaert gerði sig líklega til að skora enn eitt landsliðsmarkið. Sandra getur verið stolt af sínum fyrsta leik á stórmóti.

Sif Atladóttir, hægri bakvörður 7

Sterk varnarlega og örugg í sínum aðgerðum en bauð ekki upp á mikið sóknarlega. Var oft tæp í fyrri hálfleik en bjargaði sér á reynslunni.

Glódís Perla Viggósdóttir, miðvörður 8

Annar landsleikur, önnur topp frammistaða hjá Glódísi. Varðist vel, skilaði boltanum að venju vel frá sér og stýrði vörn Íslands eins og herforingi. Við vitum hvað Glódís Perla getur og hún heldur áfram að sýna það leik eftir leik.

Guðrún Arnardóttir, miðvörður 7

Örugg í öllum sínum aðgerðum. Ekki að sjá að hún væri stressuð í sínum fyrsta leik á stórmóti. 

Hallbera Gísladóttir, vinstri bakvörður 6

Oft látið meira að sér kveða í sókninni en lenti ekki í miklum vandræðum í vörninni. Traust frammistaða hjá Skagakonunni en betur má ef duga skal.

Dagný Brynjarsdóttir, miðjumaður 7

Barðist um hvern einasta bolta, vann sinn skerf af skalla boltum og var stór ástæða þess að Ísland var með yfirhöndina á miðjunni. Mögulega ósanngjörn gagnrýni en hefði mátt ógna meira í föstum leikatriðum en mörg þeirra litu út fyrir að eiga enda á kollinum á henni.

Gunnhildur Yrsa Jónsdóttir, miðjumaður 6

Hefur oft átt betri leiki. Barðist eins og ljón frá upphafi til enda en baráttan á miðjunni var gríðarleg í dag. Braut hins vegar klaufalega af sér í vítaspyrnunni sem kom Belgíu inn í leikinn á nýjan leik.

Sara Björk Gunnarsdóttir (fyrirliði), miðjumaður 6

Ekki alveg sú Sara Björk sem maður er vanur að sjá í íslensku treyjunni enda leikformið ekki mikið. Var tekin af velli þegar þreytan var farin að segja til sín.

Karólína Lea Vilhjálmsdóttir, hægri kantmaður 8

Gríðarlega mikilvæg þessu íslenska liði. Finnur sig betur á miðjunni en getur einnig leyst stöðu kantmanns. Skapaði mikinn usla með föstu leikatriðum sínum og átti svo hreint út sagt stórkostlega stoðsendingu í marki Berglindar Björgu.

Sveindís Jane Jónsdóttir, vinstri kantmaður 8 (Maður leiksins)

Eitt helsta sóknarvopn Íslands. Ógnaði ítrekað með hraða sínum og krafti. Var einkar óheppin að skora ekki í síðari hálfleik. Vantaði mögulega aðeins betri sendingar þegar hún komst í hættulegar stöður en hefur eflaust séð til þess að bakverðir Belgíu munu eiga erfitt með svefn næstu daga og vikur.

Berglind Björg Þorvaldsdóttir, framherji 7

Spilaði vel og mun taka sinn skerf af fyrirsögnum. Brenndi af vítaspyrnu í fyrri hálfleik þar sem ljóst var að stressið tók yfir en bætti upp fyrir það í síðari hálfleik þegar hún sýndi hversu mikill refur í teignum hún er.

Varamenn

Svava Rós Guðmundsdóttir, framherji 6 - Kom inn fyrir Bergindi Björgu á 71. mínútu.

Var smá tíma að finna taktinn en ógnaði duglega undir lok leiks. Það var því miður of lítið of seint.

Agla María Albertsdóttir, kantmaður - Kom inn fyrir fyrir Söru Björk á 86. mínútu.

Spilaði of lítið til að fá einkunn.

Alexandra Jóhannsdóttir, miðjumaður - Kom inn fyrir Karólínu Leu á 91. mínútu.

Spilaði of lítið til að fá einkunn.