Stelpurnar komast á heims­meistara­mótið í tæka tíð

Bára Magnúsdóttir, sem Jazzballetskóli Báru, JSB, er kenndur við, segir að unnið hafi verið að því baki brotnu frá því að flug stelpnanna var fellt niður í gær að koma þeim til Spánar.

Flug þeirra var fellt niður vegna þess að rekist var utan í flugvél Play á flugvelli erlendis og hún tafðist í viðgerð með þeim afleiðingum að hún var ekki nothæf í gær.

„Þetta er alveg í fullum gangi að koma keppendum út. Því ef þær komast ekki út í dag eða á morgun er ferðin ónýt af því þá komast þær of seint í keppnina, þær eru að keppa fyrir Íslands hönd á Dance World Cup, heimsmeistaramóti. Þetta er náttúrulega dálítið mikið mál, af því að það eru millilendingar og rútuferðir,“ segir Bára í samtali við Vísi.

Hún segir að helmingur hópsins sé kominn út en hinn helmingurinn bíði enn á Íslandi með öndina í hálsinum. 

Eftir að Vísir ræddi við Báru hefur fengist staðfest að helmingur hópsins kemur á áfangastað um klukkan þrjú í nótt eftir að hafa ferðast í allan dag. Stelpurnar munu því ná að keppa á morgun þó þær verði eflaust ansi þreyttar.

Hinn helmingurinn flýgur svo út til Parísar í fyrramálið með Play og þaðan til Bilbao, sem er nálægt San Sebastian þar sem keppnin fer fram. Sá hluti hópsins keppir ekki fyrr en á miðvikudag og því er ljóst að allir keppendur komast á mótið fyrir keppni.

Þetta staðfestir Þórdís Schram, aðstoðarskólastjóri JSB og dóttir Báru, í samtali við Vísi en hún er stödd úti á Spáni.

Þurfa að leggja út tvær til þrjár milljónir króna

Bára segir hluta af vandanum vera að leggja þarf út fyrir nýju fargjaldi, rútuferðum og gistingu á hótelum. „Það er of flókið að tala við hvern foreldra fyrir sig. Það er bara verið ganga frá því núna hvernig á að gera þetta fyrir svona marga í einu og skólinn stendur bara á bak við það og það er verið ganga frá því að far fyrir alla verði greitt, allir komist í keppnina. Svo verðum við bara að taka á því eftir á, hvernig við fáum það endurgreitt,“ segir hún.

Hún telur að útlagður kostnaður verði á bilinu tvær til þrjár milljónir króna.

Bára segir að hópurinn, sem telur tæplega sextíu manns, eigi bókað flugfar með Play frá Spáni að móti loknu. Hún vonar að það standi. 

„En þessi hlið á ferðinni, sem við leggjum út fyrir fólkið að komast í keppnina. Það förum við fram á við Play að verði endurgreitt. En það er meira en það, það var líka búið að borga hótel fyrir ákveðið marga daga, rútuferð af því það er millilent og tekin rúta í marga klukkutíma, það er svolítið erfitt að komast á keppnisstað,“ segir hún.

Þá segir hún að allir, fararstjórar, foreldrar og stjórnendur, hafi starfað sem einn maður í því að koma stelpunum á keppnisstað.

„Við erum ekki vön að hlaupa frá hálfkláruðu verki. Þannig að við reynum að komast á leiðarenda og ljúka þessu verkefni, svo tökumst við bara á við afleiðingarnar seinna,“ segir Bára að lokum.

Fréttin hefur verið uppfærð.