Arsenal fær ungan Brassa eftir stapp við Wolves og FIFA

Marquinhos leikur sem framherji og hægri kantmaður. Hann byrjaði að spila fyrir Sao Paulo í fyrra en lék alls 33 leiki fyrir félagið. Hann mun koma beint inn í aðalliðshóp Arsenal.

Margt hefur gengið á í kringum félagsskipti kappans en hann skrifaði undir fimm ára samning við Sao Paulo árið 2019. Þrátt fyrir það rann samningur hans út í sumar samkvæmt Alþjóðaknattspyrnusambandinu, FIFA, þar sem lög sambandsins segja til um að fyrsti atvinnumannasamningur ungra leikmanna megi ekki vera lengri en þrjú ár.

Fimm ára lengdin var samþykkt af brasilíska knattspyrnusambandinu en í augum FIFA er hann samningslaus þann 30. júní næst komandi.

Wolves á Englandi nýtti sér þetta og gerði samning við Marquinhos um að ganga til liðs við félagið, að samningi hans loknum, fyrr í vor. Þrátt fyrir að gengið hafi verið frá þeim skiptum stökk Arsenal til og gerði Brassanum unga einnig samningsboð.

Úlfarnir hugðust kæra Arsenal fyrir vikið en samkvæmt fregnum frá Englandi hefur það mál verið leyst milli félaganna tveggja. Arsenal féllst þá á að greiða Sao Paulo þrjár milljónir punda fyrir Marquinhos til að bæta þeim upp samningavesenið.

Marquinhos er annar leikmaðurinn sem Arsenal festir kaup á í sumar á eftir bandaríska markverðinum Matt Turner sem kemur frá New England Revolution í Bandaríkjunum.