Mickelson missir af fyrsta Mastersmótinu í næstum því þrjá áratugi

Óskar Ófeigur Jónsson skrifar 22. mars 2022 15:30

Phil Mickelson verður ekki með á Mastersmótinu og munu örugglega margir aðdáendur sakna hans. Getty/Luke Walker

Bandaríski kylfingurinn Phil Mickelson verður ekki með á Mastersmótinu í golfi sem fer fram á Augusta National golfvellinum í næsta mánuði.

Mastersmótið er fyrsta risamót ársins og þar keppa oftast gömlu meistararnir. Mickelson hefur unnið mótið þrisvar sinnum síðast árið 2010.

Phil Mickelson to miss the Masters for the first time in 28 years https://t.co/Z55CkybvAB
— The Guardian (@guardian) March 22, 2022

Mickelson verður hins vegar ekki með á Mastersmótinu í ár og er það í fyrsta sinn frá árinu 1994 þar sem hann keppir ekki á mótinu.

Forráðamenn Mastersmótsins staðfestu í gær að Mickelson yrði ekki með. Þetta hefði verið hans þrítugasta Mastersmót á ferlinum.

Golf s ongoing cancellation of Phil Mickelson has now forced him out of the Masters. You don t have to agree with the things he said recently, for which he apologised, to think this is now turning into an unedifying sporting crucifixion. I ll play with you, @PhilMickelson
— Piers Morgan (@piersmorgan) March 21, 2022

Hinn 51 árs gamli Mickelson kom sér í mikil vandræði með yfirlýsingum sínum um stjórnvöld í Sádí-Arabíu og golfdeild þar í landi.

Mickelson tók þátt í að stofna nýja ofurdeild í Sádí-Arabíu sem ætlar í samkeppni við PGA-mótaröðina. Þrátt fyrir það blótaði Mickelson sádí-arabískum stjórnvöldum í sand og ösku í samtali við rithöfundinn Alan Shipnuck sem skrifar væntanlega ævisögu kylfingsins. Mickelson sakaði stjórnvöld í Sádí-Arabíu meðal annars um íþróttaþvott.

„Þetta eru ógnvænlegir skrattakollar til að vera í slagtogi við. Við vitum að þeir myrtu Khashoggi og standa sig skelfilega þegar kemur að mannréttindum. Fólk þarna er myrt fyrir að vera samkynhneigt,“ sagði Mickelson en bætti við að þetta væri einstakt tækifæri til að breyta því hvernig PGA-mótaröðin virkar.

Mickelson hefur beðist afsökunar á ummælum sínum sem fóru mjög illa í marga. Margir félagar hans á bandarísku mótaröðinni gagnrýndu hann harðlega. Mickelson missti líka stóra styrktaraðila eins og KPMG, Amstel Light og Workday.