Sjáðu mark Al­fonsar sem kom Bodø/Glimt á­fram í Sam­bands­deildinni

Bodø/Glimt mætti AZ Alkmaar í Hollandi í seinni leik liðanna í sextán liða úrslitum Sambandsdeildarinnar í gær. Bodø/Glimt leiddi 2-1 eftir fyrri leikinn í Noregi.

Gríski framherjinn Vangelis Pavlidis kom AZ yfir á 18. mínútu en Amahl Pellegrino jafnaði fyrir Bodø/Glimt átta mínútum síðar. Pavlidis var svo aftur á ferðinni á 30. mínútu þegar hann skoraði sitt annað mark. Fleiri urðu mörkin í venjulegum leiktíma ekki og því þurfti að framlengja.

Í uppbótartíma fyrri hálfleiks framlengingarinnar átti Hugo Vetlesen fyrirgjöf frá hægri inn á vítateig AZ. Þar var Alfons og hann stýrði boltanum í fjærhornið, framhjá Peter Vindahl, markverði hollenska liðsins.

Lokatölur urðu 2-2 og því var það mark Alfonsar sem tryggði Bodø/Glimt sæti í átta liða úrslitunum. Allt það helsta úr leiknum í Alkmaar í gær má sjá í spilaranum hér fyrir neðan.

Alfons reyndist Bodø/Glimt svo sannarlega mikilvægur gegn AZ en hann lagði upp fyrra mark liðsins í fyrri leiknum fyrir Pellegrino. Alfons hefur leikið sextán leiki í Sambandsdeildinni á tímabilinu, skorað eitt mark og gefið þrjár stoðsendingar.

Bodø/Glimt varð í gær fyrsta norska liðið til að komast í átta liða úrslit Evrópukeppni í 23 ár, eða síðan Vålerenga komst í átta liða úrslit Evrópukeppni bikarhafa tímabilið 1998-99. Vålerenga mætti þar Chelsea og tapaði 6-2 samanlagt.

Dregið verður í átta liða úrslit Sambandsdeildarinnar klukkan 14:00 í dag. Hægt verður að fylgjast með beinni útsendingu frá drættinum á Stöð 2 Sport 2.

Liðin sem Bodø/Glimt getur mætt eru eftirfarandi: Slavia Prag, Leicester City, Marseille, PAOK, Roma, Feyenoord og PSV Eindhoven.