Fyrstur með 60 og 17 leik í NBA síðan Shaq gerði það fyrir 22 árum síðan

Towns skoraði 60 stig og tók 17 fráköst þegar Timberwolves vann 149-139 sigur á Spurs.

Þetta er auðvitað það mesta sem leikmaður hefur skorað í deildinni í einum leik í vetur og sló Towns út þá LeBron James og Trae Young sem báðir höfðu náð að skora 56 stig í einum leik.

Towns varð enn fremur sá fyrsti til að ná 60 stigum og tók 17 fráköstum í leik síðan að Shaquille O'Neal var með 61 og 23 fyrir Los Angeles Lakers 6. mars 2000. Þá hafa aðeins fimm leikmenn náð 60 stigum og 15 fráköstum í leik síðustu fimmtíu ár en hinir þrír eru James Harden (2019), Michael Jordan (1990) og Karl Malone (1990).

„Ég sagði við þjálfarann fyrir leikinn: Heyrðu við þurfum þennan sigur. Ég mun gera allt sem ég get til þess. Ef ég þarf að spila 44 eða 48 mínútur þá mun ég gera það. Það var hugarfar mitt sem ég kom inn í leikinn með. Ég varð að dóminera í þessum leik. Ég varð að spila minn besta leik,“ sagði Karl-Anthony Towns.

Þetta er stigamet hjá félaginu en Towns hitti úr 19 af 31 skoti sínu í leiknum, þar af 7 af 11 þriggja stiga skotum. Hann setti einnig niður 15 af 16 vítum sínum.

Þessi frammistaða Town stal náttúrulega sviðsljósinu af öllum leikjum næturinnar en það voru fleiri að spila mjög vel.

Trae Young skoraði 46 stig í sigri Atlanta Hawks á Portland Trail Blazers, daginn eftir að hann skoraði 47 stig í sigri á Indiana. Young var einnig með 12 stoðsendingar en hann er fyrsti leikmaðurinn í NBA í vetur sem skorað fjörutíu stig eða meira tvö kvöld í röð.

Nikola Jokic fagnaði sigri í uppgjörinu á móti Joel Embiid en flestir telja að þeir séu líklegastir til að vera kosnir mikilvægustu leikmenn deildarinnar. Jokic var með 22 stig, 13 fráköst og 8 stoðsendingar í 114-110 sigri Denver Nuggets liðsins á útivelli á móti Philadelphia 76ers.

Embiid skoraði 34 stig og James Harden var með 24 stig, 11 stoðsendingar og 9 fráköst. 76ers byrjaði vel þá Embiid og Harden en þetta var þriðja tap liðsins í síðustu þremur leikjum. Denver endaði aftur á móti tveggja leikja taphrinu með þessum sigri.

Stephen Curry var með 47 stig á aðeins 35 mínútum þegar Golden State Warriors vann 126-112 sigur á Washington Wizards en hann hitti meðal annars úr 7 af 14 þriggja stiga skotum sínum og var líka með 6 stoðsendingar og 6 fráköst. Curry átti einmitt afmæli í gær og hélt upp á það með þessum frábæra hætti.

LeBron James þarf helst að skora fimmtíu stig svo Los Angeles Lakers liðið vinni þessa dagana og því dugðu 30 stig ekki á móti Toronto Raptors. Raptors vann leikinn með ellefu stigum, 114-103 þar sem Gary Trent Jr. skoraði 28 stig og Pascal Siakam var með 27 stig, 11 fráköst og 5 stoðsendingar.