Eriksen vissi að hann myndi spila aftur aðeins tveimur dögum eftir hjartastoppið

Eriksen gerði nýverið sex mánaða samning við Brentford en hann yfirgaf Inter undir lok síðasta árs. Daninn mátti ekki spila með gangráðinn sem var þræddur í hann á Ítalíu og þurfti því að fara þaðan til að halda ferlinum áfram.

Þrátt fyrir að aðeins sjö mánuðir séu síðan Eriksen fór í hjartastopp er hann klár í slaginn. Í viðtali við heimasíðu Brentford var hann spurður hvenær hann hefði trúað því að hann myndi snúa aftur á fótboltavöllinn.

„Tveimur dögum eftir atvikið. Ég áttaði mig á hvað hafði gerst seinna um kvöldið og næstu dagar fóru í að ná áttum,“ sagði Eriksen.

„Síðan komu niðurstöður úr öllum prófunum. Ég hlustaði á læknana og eitt leiddi af öðru. Ef ég gæti gert það sem þeir lögðu fyrir mig gæti ég komið til baka hægt og rólega. Fyrst í stað var mikið um próf til að sjá hvernig hjartað myndi bregðast við áreynslu. Sem betur fer gekk það vel. Ég gat bætt við mig í hverjum mánuði og síðan byrjað að spila. Þótt þú sért með gangráð eru þér engin takmörk sett.“

Eriksen verður fyrsti leikmaðurinn til að spila með gangráð í ensku úrvalsdeildinni. Hann þekkir vel til þar en hann lék lengi með Tottenham.

Næsti leikur Brentford er gegn Englandsmeisturum Manchester City annað kvöld.