MMA bardagaklúbbur opnar í World Class

Arnar Freyr Vigfússon og Árni Ísaksson eru yfirþjálfarar World Class MMA klúbbsins en þá má kalla frumkvöðla bardagaíþróttasenunnar hér á landi. Arnar Freyr er m.a einn af stofnendum Mjölnis, með svarta beltið í BJJ og býr yfir nær tveggja áratuga reynslu í bæði keppnum og sem þjálfari. Arnar segir bardagaíþróttir henta öllum aldri, byggja upp sjálfstraust og þjálfa innri ró.

Frumhvatirnar fá útrás

„Bardagaíþróttir eru fyrir alla og hér æfir fólk í öruggu umhverfi undir stjórn þjálfara á heimsklassa. Ávinningurinn er margþættur, hreyfingin, félagsskapurinn og aukið sjálfstraust. Að æfa bardagaíþróttir kennir manni að takast á við áskoranir sem mæta manni í lífinu, einbeitingin er algjör og maður getur ekki hugsað um neitt annað á meðan. Þetta losar um streitu og hvílir hugann,“ útskýrir Arnar.

Hann segir marga sem upplifað hafa áföll finna hugarró í bardagaíþróttum. „Ég byrja til dæmis sjálfur í þessu þegar ég missti móður mína 24 ára. Maður sækir í að geta gleymt sér í leik og það er nákvæmlega það sem gerist. Þarna fá frumhvatirnar útrás.“

Opnir tímar og námskeið

„World Class MMA verður annarsvegar opnir tímar fyrir þá sem eru þegar með grunn og vilja halda áfram að æfa og hins vegar hliðarnámskeið eins og sjálfsvarnarnámskeið og fleira. Allir byrja hins vegar á grunnnámskeiði þar sem farið er yfir hlutina skref fyrir skref. Við verðum með unglingastarf og barnastarf frá 8 ára aldri og ýmislegt fleira er í mótun,“ segir Arnar og bætir við að forvarnargildi felist í þjálfun bardagaíþrótta. „Að æfa bardagaíþróttir hefur ofboðslegt forvarnargildi fyrir unglinga. Ég hef unnið í því umhverfi erlendis, bæði í einkageiranum og í opinbera geiranum með góðum árangri.“

Aðgangur að átta sundlaugum

Öllum kortum í World Class og námskeiðum fylgir aðgangur að öllum stöðvunum. Arnar segir einstakt að MMA klúbbur geti boðið upp á jafn víðtæka þjónustu. „Þeir bardagaklúbbar sem fyrir eru hér á landi bjóða ekki viðlíka þjónustu og við getum boðið hér, aðgang að átján líkamsræktarstöðvum og átta sundlaugum.“

Vaxandi sport

Arnar segir vinsældir MMA hafa margfaldast undanfarin ár og Íslendingar hafi meðal annars skapað sér nafn í MMA heiminum gegnum íslenska keppendur.

„Áhorf á bardagaíþróttir hefur margfaldast og MMA klúbbar hafa sprottið upp úti um allt. Ég hef verið núna í tuttugu ár í sportinu og nálgunin er ekki sú sama í dag og hún var þegar við stofnuðum Mjölni til dæmis. Til að setja hlutina í samhengi var UFC keypt á 2 milljónir dollara árið 1993 en selt á 4 milljarða dollara árið 2016,“ segir Arnar og hvetur fólk til þess að kynna sér nýja klúbbinn í World Class.