Varamaðurinn Ramos sá rautt í jafntefli gegn Lorient

Lorient í næstneðsta sæti deildarinnar og hafði tapað átta af síðustu tíu leikjum sínum í deildinni þegar kom að leik kvöldsins og ekki unnið leik síðan í september.

Lionel Messi og félagar áttu í erfiðleikum með að finna glufur á vörn heimamanna og það var Lorient sem hafði 1-0 forystu í leikhléi eftir mark Thomas Monconduit á 40.mínútu.

Sergio Ramos var skipt inná í leikhléi og kom í vörn PSG í sínum öðrum deildarleik fyrir félagið. Hann átti erfitt uppdráttar og fékk tvö gul spjöld með stuttu millibili seint í leiknum. Var hann því rekinn af velli á 85.mínútu.

Einum færri tókst PSG að stela einu stigi því Mauro Icardi skoraði í uppbótartíma.

Stuðningsmenn PSG þurfa þó ekki að missa svefn yfir þessum slæmu úrslitum því liðið er í algjörri yfirburðarstöðu á toppi deildarinnar með þrettán stiga forskot á næsta lið.