Lakers menn stunda það að vinna í framlengingu þessa dagana

Kevin Durant skoraði 30 stig og James Harden var með 59. þrennuna á ferlinum þegar Brooklyn Nets vann 123-90 útisigur á Orlandi Magic. Durant hitti úr 11 af 12 skotum sínum í leiknum og Harden var með 17 stig, 11 fráköst og 11 stoðsendingar.

Fimm leikja sigurganga liðsins endaði á móti Chicago Bulls í leiknum á undan en stórstjörnurnar sáu til þess að liðið komst strax aftur á sigurbraut. LaMarcus Aldridge skoraði 21 stig en hjá Orlando var Terrence Ross stigahæstur með 17 stig.

Russell Westbrook var með þrennu þegar Los Angeles Lakers vann Miami Heat í framlengdum leik, 120-117. Westbrook var komin með þrennu fyrir framlengingu en hann endaði með 25 stig, 12 fráköst og 14 stoðsendingar. Þetta var annar sigur Lakers í röð og þeir hafa báðir komið í framlengingu.

Lakers lék áfram án LeBron James en Malik Monk kom með 27 stig inn af bekknum og Anthony Davis var með 24 stig og 13 fráköst. Bam Adebayo skoraði 28 stig fyrir Miami auk þess að taka 10 fráköst og stela 6 boltum.

Andrew Wiggins skoraði 35 stig og Stephen Curry var með 25 stig þegar Golfen State Warriors hélt áfram sigurgöngu sinni með 123-110 sigri á Minnesota Timberwolves.

Kevon Looney var með 17 fráköst og 11 stig. Það dugði ekki Timberwolves liðinu að Anthony Edwards skoraði 48 stig í leiknum. Golden State hefur nú unnið tíu af ellefu leikjum sínum í vetur.

Phoenix Suns liðið er komið á mikið skrið eftir smá erfiðleika í byrjun tímabilsins og fagnaði sínum sjötta sigri í röð þegar liðið vann 119-109 heimasigur á Portland Trail Blazers. Frank Kaminsky setti nýtt persónulegt met með því að skora 31 stig en tók stöðu Deandre Ayton sem var meiddur.

Chris Paul skoraði 21 stig fyrir Phoenix sem hefur nú unnið sjö af tíu leikjum sínum á leiktíðinni. Damian Lillard skoraði 28 stig en það var ekki nóg því Portland liðið tapaði öðrum leiknum í röð og fimmta leiknum af síðustu sjö.

Zach LaVine skoraði 23 stig og Lonzo Ball setti niður sjö af fimmtán þriggja stiga körfum Chicago Bulls þegar liðið vann 117-107 sigur á Dallas Mavericks.

Fimm leikmenn Bulls liðsins skoruðu yfir tíu stig og liðið vann sinn annan sigur í röð og þann áttunda í ellefu leikjum á tímabilinu. Kristaps Porzingis skoraði 22 stig fyrir Dallas og Luka Doncic var með 20 stig, 10 stoðsendingar og 8 fráköst.

Pat Connaughton var maðurinn á bak við sigur meistara Milwaukee Bucks í Madison Square Garden í New York en hann setti niður þrjá þrista í lokin og endaði með 23 stig í 112-100 sigri Bucks.

Bucks missti niður 24 stiga forskot í leiknum en tókst að landa sigrinum í lokin. Jrue Holiday skoraði 18 stig og Giannis Antetokounmpo var með 15 stig. 15 fráköst og 8 stoðsendingar. Hjá New York var Derrick Rose með 22 stig og 7 stoðsendingar.