Leynilöggan halaði inn milljónir um frumsýningarhelgina

Fram kemur í tilkynningu frá aðstandendum myndarinnar að tekjur frá miðvikudegi til sunnudags hafi numið 23,7 milljónum króna. 13,445 gestir hafi mætt á myndina í bíó á þessum fimm dögum.

Um fjórtán þúsund manns mættu á opnunarhelgina á Mýrinni á sínum tíma í október 2006, þ.e. helgardagana þrjá, svo að Mýrin á enn metið hvað varðar aðsókn á myndina út frá gestafjölda. Hefur myndin raunar töluvert forskot á Leynilögguna en 8,503 mættu á myndina helgardagana þrjá.

Leynilögga hefur nú þegar vakið töluverða athygli út fyrir landsteinana og ekki síst fyrir þær sakir að markvörður sem varði vítaspyrnu frá Lionel Messi á HM í fótbolta 2018 sé að leikstýra hasarmynd.

Leynilögga er fyrsta leikna kvikmyndin sem Hannes Þór leikstýrir og fjallar myndin um grjótharða ofurlöggu sem er í baráttu við sjálfan sig á sama tíma og hann berst við hættulegustu glæpamenn landsins. 

Leynilögga var heimsfrumsýnd á Locarno kvikmyndahátíðinni í ágúst og hefur þaðan af meðal annars verið valin til þátttöku á kvikmyndahátíðinni Fantastic Fest í Austin, á BFI kvikmyndahátíðinni í Lundúnum og á alþjóðlegu kvikmyndahátíðinni í Busan í Suður Kóreu.

Kvikmyndin er skrifuð af Nínu Petersen, Sverri Þór Sverrissyni og Hannesi Þór Halldórssyni. Myndin er framleidd af Lilju Ósk Snorradóttur fyrir Pegasus Pictures og með aðalhlutverk fara Auðunn Blöndal, Egill Einarsson, Steinunn Ólína Þorsteinsdóttir, Vivian Ólafsdóttir, Sverrir Þór Sverrisson og Björn Hlynur Haraldsson.