HK vann ansi mikilvægan 2-1 sigur á Fylki í kvöld er liðin mættust í frestuðum leik í Pepsi Max deild karla. Fylkir komst yfir en gestirnir snéru við taflinu í síðari hálfleik.
Leiknum var frestað á dögunm er leikmenn Fylkis þurftu í sóttkví eftir að einn leikmaður liðsins smitaðist en leikurinn í kvöld var ansi fjörugur og hart var barist.
Það voru gestirnir úr Kópavogi sem byrjuðu betur og voru skarpari fyrstu mínúturnar en hægt og rólega unnu Fylkismenn sig inn í leikinn án þess þó að fá hættuleg færi.
HK-menn áttu skot við og við en besta færið fékk Djair Williams er skot hans var bjargað á línu á 26. mínútu. Það líðu þó bara fimm mínútur og þá leit fyrsta markið dagsins ljós.
Daði Ólafsson þrumaði þá aukaspyrnu í netið en Fylkismenn voru nærri því að bæta við í fyrri hálfleik en HK að jafna.
Fylkismenn fengu álitleg færi til þess að tvöfalda forystuna í upphafi síðari hálfleiks en það voru Kópavogsbúar sem skoruðu annað mark leiksins og það gerði Birnir Snær Ingason.
Eftir stundarfjórðung í síðari hálfleik skilaði hann fyrirgjöf í netið og fimmtán mínútum síðar voru gestirnir komnir yfir er varnarmaðurinn Martin Rauschenberg skoraði.
Daninn fékk boltann í teignum eftir aukaspyrnu, snéri laglega með boltann og þrumaði honum í netið. Eins og hann hafi aldrei gert neitt annað.
Eftir þetta reyndu Fylkismenn að finna jöfnunarmarkið. Þeir hreyfðu við liðinu sínu en það tókst ekki og HK-ingar fögnuðu dýrmætum þremur stigum.
HK er þó áfram í næst neðsta sætinu en nú með níu stig. Leiknir og Fylkir eru í níunda og tíunda sæti með ellefu stig en ÍA er á botninum með sex stig.
