Aug­lýsa eftir auka­leikurum á Hellu fyrir stórt Net­flix-verk­efni

„Um er að ræða stórt og mikið verkefni og vafalaust spennandi að taka þátt í slíku. Því miður má ekki greina frá því hvaða þætti um ræðir í bili en lofa að áhugavert er það,“ skrifar íbúi á Hellu í færslunni.

Samkvæmt færslunni er leitað að karlmönnum á aldrinum 20-55 ára auk nokkurra annarra um sjötugt, með „frekar villimannslegt útlit,“ það er menn með úfið, sítt hár, óklippt og ólitað og ósnyrt skegg af öllum stærðum og gerðum.

„Einnig leitum við að karlmönnum á aldrinum 20-55 ára með hefðbundnar hárgreiðslur, ólitað hár með eða án skeggs,“ stendur í færslunni og þar segir engar tískuklippingar eða litað hár koma til greina.

Þá er einnig leitað eftir konum á aldrinum 20-50 ára með náttúrulegt, sítt hár eða heillitað hár í náttúrulegum lit.

„Augljós og áberandi tattoo ganga ekki upp. Ákveðnir búningar tilheyra umræddum hlutverkum, sumir eru fyrir mjög netta og aðrir búningar fyrir menn í betri holdum og fleiri þar á milli.“

Hver aukaleikari mun, samkvæmt færslunni, vera einn dag í tökum og fara tökurnar fram dagana 5. og 7. ágúst næstkomandi. Áhugasömum er bent á að senda tölvupóst á eskimo@eskimo.is.