Liðið sem tapaði í Laugardalshöllinni árið 2018 komið á Ólympíuleikana

Barist var um fjögur síðustu sætin inn á leikana í fjórum aðskildum undankeppnum sem hver og ein innihélt sex þjóðir.

Tékkar og Grikkir komust í úrslitaleikinn á þeim hluta undankeppninnar sem fór fram í Victoria í Kanada en heimamenn í kanadíska liðinu sátu aftur á móti eftir í undanúrslitunum.

Tékkar unnu 103-101 sigur á Kanadamönnum í undanúrslitaleiknum sem þurfti að framlengja. Tomas Satoransky, leikmaður Chicago Bulls í NBA-deildinni, skoraði sigurkörfuna 1,4 sekúndum fyrir leikslok.

Tékkar höfðu komist í undanúrslitaleiknum þrátt fyrir sautján stiga tap á móti Tyrkjum. Eins stigs sigur á Úrúgvæ kom þeim áfram í undanúrslitin.

Tékkar áttu síðan mjög góðan leik í úrslitaleiknum á móti Grikkjum þar sem þeir unnu öruggan 25 stiga sigur, 97-72. Grikkir komust því ekki á leikana í ár en Tékkar verða þar í fyrsta sinn síðan að þeir hættu að vera hluti af Tékkóslóvakíu.

Þessi frábæri árangri Tékka rifjar upp þegar þeir mættu í Laugardalshöllinni í febrúar 2018 í undankeppni HM.

Íslensku strákarnir áttu þá frábæran leik og unnu 76-75 sigur á tékkneska liðinu.

Martin Hermannsson skoraði 26 stig í leiknum, Tryggvi Snær Hlinason var með 15 stig, 8 fráköst og 3 varin skot, Jón Arnór Stefánsson skoraði 11 stig og Haukur Helgi Pálsson var með 10 stig og 5 stoðsendingar.

Þetta var líka merkilegur leikur fyrir þær sakir að þetta var 147. og síðasti landsleikur Loga Gunnarssonar sem var tolleraður í leikslok.  Logi lék með landsliðinu frá 2000 til 2018 og skoraði 1475 stig fyrir íslenska landsliðið eða yfir tíu stig í leik.

Umræddur Satoransky spilaði ekki í Höllinni en Patrik Auda var þar stigahæstur Tékka með 23 stig. Hann skoraði 20 stig í sigrinum á Grikkjum í úrslitaleiknum og var líka stigahæstur í þeim leik en stigahæsti maðurinn í undanúrslitaleiknum var Blake Schilb með 31 stig. Schilb, sem er orðinn 37 ára gamall, skoraði 5 stig í Laugardalshöllinni.

Tomas Satoransky var með 18 stig, 7 fráköst og 5 stoðsendingar í sigrinum á Kanada en skoraði 12 stig í úrslitaleiknum.

Ondrej Balvín var með 14 stig, 19 fráköst og 5 varin skot á móti Kanada og svo 14 stig og 7 fráköst á móti Grikkjum. Balvín var aftur á móti með 11 stig og 6 fráköst í tapleiknum í Laugardalnum.

Fyrir utan Grikkland og Tékkland þá tryggðu eftirtaldar þjóðir sér einnig þátttökurétt í körfuboltakeppni Ólympíuleikanna: Þýskaland, Slóvenía og Ítalía.