23 laxar í fyrsta hollinu í Miðfjarðará

Urriðafoss opnaði fyrstur og veiðin þar er núna að teygja sig í 300 laxa sem gerir það svæði að aflahæsta veiðisvæði landsins. Besta opnunin er engu að síður sú sem er nýlokið í Miðfjarðará en fyrsta hollið landaði 23 löxum og mest af því var fallegur tveggja ára lax. Þetta er mjög fín byrjun í Miðfjarðará þrátt fyrir að hún hafi oft opnað með fleiri veidda laxa en það hefur verið ansi kalt fyrir norðan sem hefur reynt pínu á þá sem hafa staðið vaktina. Veiðivísir heyrði í Rafn Val leigutaka Miðfjarðarár í morgun og hann sagði að það sem stæði upp úr þessari opnun var hvað tveggja ára laxinn er vel haldinn og þykkur.  

Það hefur samt ekki alltaf verið sama sem merki milli góðrar veiði í Miðfjarðará og að veiðin verði góð í öðrum ám í hennar næsta nágrenni. Nærtækt er að sjá hvað það er rólegt í Blöndu, eiginlega svo rólegt að menn eru farnir að hafa smá áhyggjur af henni.