Þrí­brotin en þakk­lát fyrir nafn­lausan hjúkrunar­fræðing

Hún hafði verið við gosstöðvarnar ásamt kærasta sínum og vinkonu. Þar höfðu þau verið í um tvo tíma og notið sjónarspilsins sem eldsumbrotin hafa upp á að bjóða. Þau voru ekki langt komin á bakaleiðinni þegar Klaudia datt og fótbrotnaði.

„Ég heyrði þarna ógeðslegt hljóð þegar beinið brotnaði. Þegar ég lá þarna kom svo svakalega mikill vindur og mér varð svo kalt. Þá kom bara hópur af Íslendingum sem byrjuðu að klæða sig úr og breiða yfir mig,“ segir Klaudia.

Hún segir einhvern úr hópnum hafa lagt af stað niður gönguleiðina til þess að ná í björgunarsveitarfólk. Á meðan hafi fólk lagt henni til ýmsar flíkur, úlpur, vindbuxur, ullarpeysu og teppi, svo henni yrði ekki kalt á meðan hún biði björgunarfólks. Það er Klaudia þakklát fyrir.

Hjúkrunarfræðingur til bjargar

Sérstaklega er Klaudia þó þakklát ókunnugri ungri konu sem aðstoðaði hana, en Klaudia veit ekki hvað konan heitir.

„Það var stelpa þarna sem kom bara beint til mín, horfði í augun á mér og hjálpaði mér að ná andanum. Hún var að passa mig þegar ég var alveg að detta út. Hún sagði ekki hvað hún héti en ég held að hún sé hjúkrunarfræðingur,“ segir Klaudia.

Konan hélt til að mynda í hönd Klaudiu og lét hana kreista sig þegar björgunarfólk setti spelku á þríbrotinn fótlegg Klaudiu, sem henni þótti afar sársaukafullt.

„Það var ógeðslega vont og ég var alveg að detta út. Hún var bara að segja mér að horfa á sig og opna augun,“ segir Klaudia. Hún segist ýmsu vön en þetta hafi einfaldlega verið svo vont að hún „grenjaði eins og smábarn.“

Magnað að sjá hjálpsemi fólks

Klaudia segir það hafa verið magnað að sjá hversu margir hafi verið tilbúnir að hjálpa henni.

„Það kom bara hópur af fólki sem gerði bara skjól utan um mig. Það var svo mikill vindur og sandurinn fauk bara beint í andlitið á mér. Ég var bara í sjokki,“ segir Klaudia sem er auðheyranlega afar þakklát þeim sem hjálpuðu henni.

„Þetta var svo fallega gert.“

„Ég er svo mikill klaufi, þannig að ég var að passa mig svo mikið að detta ekki. Það er ekkert mál að labba upp, en mjög hættulegt að labba niður,“ segir Klaudia, sem sá fleira fólk missa jafnvægið á leið niður frá eldstöðvunum.

Brotin og bólgin en þakklát

Klaudia vonast til þess að komast í aðgerð vegna fótbrotsins á miðvikudag.

„Ég er svo bólgin enn þá. Það er ekki hægt að gera aðgerð þegar ég er svona bólgin, þannig að ég er að fara í skoðun. Ég er í gifsi núna.“

Hún segir fótinn illa brotinn og það hafi strax komið í ljós. Fóturinn hafi hreinlega snúið vitlaust eftir að hann brotnaði. Þrátt fyrir vonda lífsreynslu er þakklæti þó efst í huga Klaudiu.

„Ég vil bara þakka kærlega stelpunni sem var hjá mér, fólkinu sem hjálpaði okkur og björgunarsveitinni. Allir sem hjálpuðu, bara vel gert Íslendingar. Ég er mjög fegin að vera hér.“