Neymar í París til 2025

Neymar framlengir samning sinn um fjögur ár en mikið hefur verið rætt og ritað um mögulega brottför kappans, nánast frá því hann gekk í raðir Parísarliðsins frá Barcelona sumarið 2017.

Þessi 29 ára gamli sóknarmaður hefur skorað 85 mörk í 112 leikjum fyrir PSG og hjálpað liðinu að vinna frönsku deildina í þrígang.

Franskir fjölmiðlar telja sig hafa heimildir fyrir því að nýi samningurinn færi Neymar í kringum 30 milljónir evra í árslaun, eftir skatt og ljóst að það mun ekki væsa um Brasilíumanninn í frönsku höfuðborginni næstu árin.

Stóra markmið PSG er að vinna Meistaradeild Evrópu og er ákvæði um himinháa bónusgreiðslu til Neymar takist honum að hjálpa liðinu að landa Evrópumeistaratitlinum eftirsótta.