Fótbolti

Bjartsýnn að Valgeir og Andri Fannar verði klárir gegn Rússum

Ingvi Þór Sæmundsson skrifar
Andri Fannar Baldursson ætti að geta spilað gegn Rússlandi á morgun, í fyrsta leik Íslands á EM U-21 árs landsliða.
Andri Fannar Baldursson ætti að geta spilað gegn Rússlandi á morgun, í fyrsta leik Íslands á EM U-21 árs landsliða. Getty/Harry Murphy

Vonast er til að þeir Valgeir Lunddal Friðriksson og Andri Fannar Baldursson verði klárir í slaginn fyrir fyrsta leik U-21 árs landsliðsins á EM á morgun.

Bæði Valgeir og Andri Fannar hafa glímt við meiðsli en Davíð Snorri Jónasson, þjálfari U-21 árs landsliðsins, vonast til að geta teflt þeim fram í leiknum gegn Rússlandi á morgun.

„Allir eru í ágætis standi. Valgeir er alltaf að verða betri og gerir meira með hverjum deginum. Andri Fannar er með smá hnjask og verður rólegur í dag,“ sagði Davíð á blaðamannafundi í Györ í Ungverjalandi í dag.

Að sögn Davíðs kemur það betur í ljós eftir æfingu í dag hvort þeir Valgeir og Andri Fannar geti verið með á morgun. Hann er þó vongóður.

„Við vitum betur með Valgeir og Andra Fannar á eftir. Þeir eiga klárlega að vera í lagi,“ sagði Davíð Snorri.

Andri Fannar lék þrjá leiki í undankeppni EM og Valgeir einn. Andri Fannar leikur með Bologna á Ítalíu en Valgeir, sem var valinn besti ungi leikmaður Pepsi Max-deildarinnar í fyrra, er nýgenginn í raðir Häcken í Svíþjóð.

EM U21 í fótbolta 2021

Mest lesið


Fleiri fréttir

Sjá meira


×

Mest lesið