Innlent

Við tökur á myndbandi til vina þegar 4,6 skjálftinn reið yfir

Kolbeinn Tumi Daðason skrifar
Margrét Kristín ásamt syni sínum á lóð Heilsuleikskóla Grindavíkur en foreldrar sem tök hefðu á voru beðnir um að sækja börn sín fyrr í dag vegna skjálftanna.
Margrét Kristín ásamt syni sínum á lóð Heilsuleikskóla Grindavíkur en foreldrar sem tök hefðu á voru beðnir um að sækja börn sín fyrr í dag vegna skjálftanna. Vísir/Vilhelm

Margrét Kristín Pétursdóttir, Grindvíkingur í húð og hár og starfsmaður hjá fiskvinnslunni Vísi, segir margan bæjarbúann vanann jarðskjálftum, finnist þeir jafnvel spennandi eða fyndnir. Það sem gekk á í morgun hafi verið ólíkt fyrri skjálftum enda margir óvenju stórir skjálftar sem geri að verkum að vanasta fólk verði smeykt.

Óhætt er að segja að suðvesturhornið hafi leikið á reiðiskjálfi á ellefta tímanum í morgun. Hver stóri skjálftinn reið yfir á fætur öðrum, sá stærsti 5,7 að stærð. Margrét hafði fundið fyrir nokkrum skjálftum í vinnunni þegar hún tók upp myndband við tölvuskjáinn. Hún ætlaði að sýna vinum sínum skjálfana í töflu á vef Veðurstofunnar en þá dundi enn einn stóri skjálftinn yfir.

„Þetta var svakalegt,“ segir Margrét Kristín. 

Margt starfsfólk óvant skjálftum

„Ég ætlaði að senda vinahópnum myndir af skjálftahrinunni og svo kemur bara þessi stóri. Það var mjög óþægilegt.“

Umræddur skjálfti, sem sjá má á myndbandinu hér að neðan, dundi yfir klukkan 10:17. Sá var 4,6 að stærð samkvæmt upplýsingum á vef Veðurstofu Íslands. Einn sá stærsti í morgun en þó nokkur fjöldi var yfir fjórir að stærð, einn fimm að stærð og svo sá stærsti 5,7.

Hún segist hafa upplifað hræðslu meðal starfsfólks í fiskivinnslunni. Þar séu meðal annars margir Pólverjar sem séu ekki svo vanir jarðskjálftum. 

„Við tókum þá ákvörðun up úr ellefu að leyfa þeim sem líður illa að fara heim,“ segir Margrét Kristín. Þá hafi reyndar vinnudagurinn verið hálfnaður enda hefjist starfsdagurinn í frystihúsinu klukkan sjö.

Nokkrum sinnum pakkað í neyðarkassann

Óvissustigi var lýst yfir á Reykjanesi í byrjun árs 2020. Skjálftar réðu yfir í ágúst og svo aftur stór skjálfti í október. Síðan hefur allt verið með kyrrum kjörum, þótt alltaf sé einhver hreyfing.

„Maður er nokkrum sinnum búinn að pakka í neyðarkassann,“ segir Margrét Kristín.

Frá íbúafundi í íþróttahúsinu í Grindavík í janúar í fyrra þegar óvissustigi hafði verið lýst yfir á svæðinu.Vísir/Egill

„Maður var farinn að trúa því að þetta væri búið, Covid væri að verða búið og maður gæti loksins farið að slaka á.“

Margrét hafði nýfengið tölvupóst frá leikskólanum í Grindavík þegar hún ræddi við blaðamann. Eðlilega segir hún enda grípi um sig hræðsla á leikskólanum í svona langri skjálftahrinu.

Hinir vönu samt smeykir

Hún segist sjálf hafa verið stödd í frystihúsinu í morgun og upplifað að margt fólk væri mjög hrætt.

Hún segir Grindvíkinga öllu vana en ástandið í morgun hafi varað í langan tíma og verið öðruvísi en skjálftar undanfarinna ára.

„Margir í Grindavík eru vanir, finnst þetta spennandi og jafnvel fyndið. Þetta eru óvenju margir stórir skjálftar sem gera að verkum að maður verði smá smeykur.“

Grindavík Eldgos og jarðhræringar Jarðhræringar á Reykjanesi

Tengdar fréttir

Með stærri hrinum frá upphafi mælinga

„Þetta er með stærri hrinum sem við höfum upplifað á þessum flekaskilum frá upphafi mælinga. Svoleiðis að þetta er mjög athyglisverður atburður sem er í gangi núna þessa klukkutímana,“ segir Páll Einarsson jarðeðlisfræðingur. Ekki er útilokað að kvika rati upp á yfirborðið.

Starfsmaður Landsbankans slasaðist í skjálftanum

Starfsmaður Landsbankans sem var við störf í höfuðstöðvum bankans í miðbæ Reykjavíkur varð fyrir því óláni í skjálftahrinunni í morgun að fá loftplötu í höfuðið. Rúnar Pálmason, upplýsingafulltrúi bankans, staðfestir þetta í samtali við fréttastofu.

Suðvesturhornið nötrar og stærsti skjálftinn 5,7 að stærð

Jörð hefur skolfið á suðvesturhorni landsins í morgun og virðist ekkert lát á skjálftavirkni. Fyrstu skjálftar fundust upp úr klukkan tíu og enn skelfur jörð þegar klukkan er að verða ellefu. Skjálftar hafa fundist á höfuðborgarsvæðinu, vestur í Stykkishólm og austur á Helllu.

Mest lesið


Fleiri fréttir

Sjá meira


×

Mest lesið