Körfubolti

Durant og James vinsælastir

Sindri Sverrisson skrifar
LeBron James og félagar voru bláklæddir í nótt í sigrinum gegn Denver Nuggets.
LeBron James og félagar voru bláklæddir í nótt í sigrinum gegn Denver Nuggets. Getty/Harry How

LeBron James skoraði þrefalda tvennu fyrir meistara LA Lakers í nótt þegar þeir stungu Denver Nuggets af í seinni hálfleik og unnu 114-93, í NBA-deildinni í körfubolta. Þar mættust liðin sem léku til úrslita í vesturdeildinni í fyrra.

James er einmitt efstur í vesturdeildinni eftir fyrsta hluta kosningar NBA-aðdáenda í stjörnuliðin. James og Stephen Curry hafa yfirburði í vesturdeildinni og eru einir með yfir tvær milljónir atkvæða en í austurdeildinni eru Kevin Durant og Giannis Antetokounmpo vinsælastir. Durant er raunar með flest atkvæði allra, þvert á deildir.

Eins og staðan er núna munu því James og Durant leiða stjörnuliðin tvö en næstu tölur verða birtar 11. febrúar.

James skoraði 27 stig, tók 10 fráköst og gaf 10 stoðsendingar í nótt og þýski landsliðsmaðurinn Dennis Schröder skoraði 21 stig. Lakers gerðu út um leikinn með 19-0 spretti í þriðja og fjórða leikhluta þar sem Talen Horton-Tucker lét til sín taka og skoraði 12 af 17 stigum sínum.

Lakers hafa nú unnið 17 leiki og tapað 6, og eru jafnir LA Clippers í 2.-3. sæti vesturdeildar. Utah Jazz er efst með 17 sigra og 5 töp, eftir 112-91 sigur á Atlanta Hawks í nótt.

Úrslit næturinnar:

  • Atlanta 91-112 Utah
  • Dallas 116-147 Golden State
  • Philadelphia 105-121 Portland
  • Memphis 103-115 Houston
  • LA Lakers 114-93 Denver
NBA

Mest lesið


Fleiri fréttir

Sjá meira


×

Mest lesið