Dag­skráin i dag: Stór­leikur í Vestur­bæ Reykja­víkur, úr­slita­leikur RIG í eFót­bolta og margt fleira

Stöð 2 Sport

Við hefjum upphitun fyrir körfuboltaveislu kvöldsins klukkan 17.45 þegar Dominos Körfuboltakvöld – Upphitun hefst. Þaðan færum við okkur í Breiðholtið þar sem ÍR tekur á móti Grindavík klukkan 18.10.

Að þeim leik loknum er ferðinni heitið í Vesturbæ Reykjavíkur þar sem ríkjandi Íslandsmeistarar KR taka á móti Keflavík. Heimamenn eru enn að reyna finna taktinn á meðan Keflavík hefur farið mikinn á tímabilinu. Það er því nær staðfest að það verður barist til síðasta blóðdropa.

Leikir kvöldsins ásamt öðrum leikjum umferðarinnar verður svo til umræðu í Dominos Körfuboltakvöldi sem hefst klukkan 22.00.

Stöð 2 Sport 2

Leikur Swansea City og Norwich City í ensku B-deildinni er á dagskrá klukkan 20.10 en um er að ræða tvö af betri liðum deildarinnar. Gestirnir ætla sér beint aftur upp í ensku úrvalsdeildina eftir að hafa fallið á síðustu leiktíð.

Stöð 2 Sport 4

Fiorentina tekur á móti Inter Milan í ítölsku úrvalsdeildinni klukkan 19.35. Lærisveinar Antonio Conte hjá Inter fara – tímabundið allavega – á topp deildarinnar með sigri í kvöld.

Stöð 2 ESport

Úrslitaleikur Reykjavíkurleikanna (Reykjavík International Games) í eFótbolta er á dagskrá klukkan 20.00.

Golfstöðin

Við hefjum leik klukkan 08.00 þegar Evrópumótaröðin fer af stað en keppt er í Saudi-Arabíu að þessu sinni. Útsendingunni lýkur 09.50 en við höldum svo aftur með beina útsendingu klukkan 11.30 Klukkan 20.00 hefst svo bein útsending frá PGA-mótaröðinni.