Ofurtríóið sýndi hvers það er megnugt eftir tapið óvænta

Brooklyn var nýbúið að tapa gegn neðsta liði deildarinnar, Washington Wizards, á sunnudagskvöld en þar naut Hardens reyndar ekki við. Í nótt sýndi ofurtríóið, sem varð til í síðasta mánuði, hins vegar hvað það getur gert gegn hinum af bestu liðum deildarinnar.

Irving átti sinn stigahæsta leik í vetur og skoraði 39 stig, þar á meðal átta í röð þegar Brooklyn náði forystu í fjórða leikhluta sem liðið lét ekki af hendi. Durant skoraði 28 stig og Harden 23 stig auk þess að eiga 14 stoðsendingar og 11 fráköst.

„Við vissum að þeir myndu sýna hvað þeir geta í kvöld svo þetta var bara spennandi leikur. Þetta var frábær keppni á milli nokkurra af bestu leikmönnum heims,“ sagði Irving.

Kawhi Leonard skoraði 33 stig og Paul George 26 fyrir Clippers. Þetta var aðeins annað tap liðsins í síðustu 12 leikjum en liðið er í 2. sæti vesturdeildarinnar með 16 sigra og sex töp. Brooklyn er í 2. sæti austurdeildar með 14 sigra og níu töp.

Úrslitin úr öðrum leikjum næturinnar má sjá hér að neðan en þess ber að geta að Fred VanVleet skoraði heil 54 stig í sigri Toronto Raptors á Orlando Magic, 123-108. Stephen Curry skoraði 38 stig, tók 11 fráköst og gaf átta stoðsendingar en það dugði skammt fyrir Golden State Warriors sem töpuðu 111-107 fyrir Boston Celtics. Jayson Tatum skoraði 27 stig fyrir Boston og tók níu fráköst.

Úrslit næturinnar: