„Sólin gerir lítið sem ekkert gagn“

Elín Margrét Böðvarsdóttir skrifar 26. desember 2020 10:30

Hvít jörð á höfuðborgarsvæðinu í dag. Vísir/Sylvía Hall

Búist er við norðan hvassviðri eða stormi með snjókomu og rigningu á morgun og taka gular veðurviðvaranir gildi um land allt í kring um miðnætti í kvöld. Hressileg suðvestanátt sem blés á landinu í gær er nú að ganga niður og tekið að draga úr éljum að því er fram kemur í hugleiðingum veðurfræðings hjá Veðurstofu Íslands.

Viðbúið er að um hádegisbil í dag verði vindur yfirleitt orðinn hægur og tekur að kólna í hægum vindinum „því sólin gerir lítið sem ekkert gagn til upphitunar á þessum árstíma,“ líkt og veðurfræðingur orðar það.

Frost verður á bilinu núll til tíu stig í dag, kaldast í innsveitum norðaustanlands. Þá er í kvöld búist við vaxandi norðanátt með éljum norðan og austan til en þurrt syðra.

„Á morgun er gert ráð fyrir að norðanáttin nái styrk hvassviðris eða storms. Búast má við rigningu eða slyddu á láglendi norðan- og austanlands, en hríð til fjalla. Undir kvöld kólnar heldur á þessum slóðum og úrkoman á láglendi færir sig yfir í snjókomu eða slyddu. Á sunnanverðu landinu á morgun verður úrkomulítið og hiti á bilinu 1 til 5 stig, en varasamir vindstrengir við fjöll eins og svo oft áður í norðanáttinni,“ segir í hugleiðingum veðurfræðings.

Samkvæmt uppfærðri veðurspá tekur gul viðvörun gildi um landið allt í kringum miðnætti í kvöld, en ekki aðeins á Norður- og Austurlandi líkt og fyrri spá gerði ráð fyrir.Veðurstofa Íslands

Veðurhorfur á landinu samkvæmt vef Veðurstofunnar:

Minnkandi suðvestanátt og él. Breytileg átt 3-8 m/s um hádegi og él á stöku stað. Frost 0 til 10 stig í dag, kaldast í innsveitum norðaustanlands. Vaxandi norðanátt í kvöld með éljum um landið norðan- og austanvert, en þurrt sunnan heiða.

Norðan og norðaustan 15-23 m/s á morgun. Rigning eða slydda á láglendi norðan- og austanlands og hiti yfir frostmarki, en snjókoma eða slydda undir kvöld og kólnar heldur. Úrkomulítið á sunnanverðu landinu og hiti 1 til 5 stig.

Á mánudag

Norðan 8-13 m/s, en 13-18 austanlands. Dálítil él á Norður- og Austurlandi, en léttskýjað um landið sunnan- og vestanvert. Frost 1 til 7 stig.

Á þriðjudag

Breytileg átt, 3-8 m/s, en norðan 8-13 allra austast á landinu. Dálítil snjókoma norðvestantil, annars skýjað með köflum, en bjartviðri sunnanlands. Frost 2 til 14 stig, kaldast í innsveitum á Norðurlandi.

Á miðvikudag og fimmtudag (gamlársdagur)

Breytileg átt, 3-8 m/s. Skýjað með köflum og líkur á stöku éljum í flestum landshlutum. Frost 1 til 10 stig, kaldast inn til landsins.

Á föstudag (nýársdagur)

Suðlæg átt og víða bjartviðri og frost, en skýjað með vesturströndinni og hiti rétt yfir frostmarki.

Fréttin hefur verið uppfærð.

Veður