Vonir um bóluefni hreyfa við mörkuðum í Asíu

Verð á hlutabréfum í Asíu náði hæstu hæðum í nótt þegar opnað var fyrir viðskipti með bréf eftir helgina en bjartsýnin þar eystra er sögð skýrast af jákvæðum fregnum af þróun bóluefnis gegn kórónuveirunni auk þess sem efnahagstölur Kína og Japan líta vel út um þessar mundir.

Hækkanir urðu í öllum geirum og er búist við að svipaðra áhrifa muni gæta á mörkuðum í Evrópu og vestanhafs þegar líður á daginn. Sérfræðingur segir í samtali við Reuters fréttaveitunna að fjárfestar hafi síðustu mánuði haldið að sér höndum og því hafi mikið fé safnast saman. Þegar vonarglæta á borð við bóluefni líti dagsins ljós, keppist menn við að fjárfesta.