Land­vernd kveðst ekki bera á­byrgð á vega­málum á Vest­fjörðum

Umhverfisverndarsamtökin Landvernd hafna því að þau beri ábyrgð á því að vegir á Vestfjörðum haldi ekki bílum sem um þá aka, og segja ábyrgðina liggja hjá Vegagerðinni. Þetta kemur fram í Facebook-færslu samtakanna.

Í færslunni deilir Landvernd skjáskoti af frétt Vísis um flutningabíl sem valt á Hjallahálsi á Vestfjörðum síðastliðinn föstudag. Í fréttinni var haft eftir Gísla Ásgeirssyni, eiganda og framkvæmdastjóra flutningafyrirtækisins Aksturs og köfunar, að hann teldi réttast að færa Landvernd trukkinn, þar sem hann teldi samtökin bera ábyrgð á bágum akstursskilyrðum á veginum.

Síðastliðið vor kærði Landvernd framkvæmdaleyfi Vestfjarðavegar um Teigsskóg, en í síðasta mánuði kom fram að framkvæmdastjóri Landverndar, Auður Önnu Magnúsdóttir, teldi að kærumöguleikar til að koma í veg fyrir vegagerð um Teigsskóg væru uppurnir eftir að úrskurðarnefnd umhverfis- og auðlindamála hafnaði öllum kröfum um ógildingu framkvæmdaleyfis til Vegagerðarinnar.

„Landvernd styður vegabætur á Vestfjörðum og eina ástæða þess að lagning nýs vegar hefur tafist er sú að Vegagerðin hefur þrjóskast við og ríghaldið í þá útfærslu vegarins sem er LANGVERST FYRIR UMHVERFIÐ,“ segir í færslu Landverndar, sem birt var í gær.

Í færslunni segir einnig að Vegagerðin hafi „sannarlega [haft] úr öðrum möguleikum að velja heldur en því að eyðileggja svæði á náttúruminjaskrá og skóg sem nýtur náttúruverndarlaga.“

Vegagerðin hafi gengið langt

Í samtali við fréttastofu ítrekaði Auður Önnu Magnúsdóttir, framkvæmdastjóri Landverndar, það sem fram kom í færslunni og sagði Vegagerðina hafa ákveðið að velja þá leið sem verst væri fyrir umhverfið.

„Við erum mjög öfundsjúk út í Vegagerðina að vera með svona góðan PR-fulltrúa sem getur skellt skuldinni af mistökum Vegagerðarinnar á pínulítil félagasamtök,“ segir Auður.

Sjálf telur Auður að þær samgöngubætur sem best myndu henta á svæðinu væri svokölluð R-leið, sem felur í sér lagningu vegar í gegnum þéttbýli á Reykhólum.

„Landvernd styður vegabætur á sunnanverðum Vestfjörðum, en það er ekki sama hvernig það er gert og við teljum að Vegagerðin hafi gengið mjög langt í því að fá það í gegn að fara þessa leið sem er verst fyrir umhverfið, þegar það er um aðrar leiðir að velja.“

Telur ummæli framkvæmdastjórans ósmekkleg

Í fréttinni sem gagnrýni Landverndar snýr að kemur fram að framkvæmdastjóri Aksturs og köfunar, Gísli Ásgeirsson, teldi réttast að færa Landvernd trukkinn sem fór út af að gjöf.

„Ætli við förum ekki bara með hann suður og skiljum hann eftir á bílaplaninu hjá framkvæmdastjóra Landverndar,“ sagði hann þá. Auður gerir athugasemd við þessi ummæli og telur þau ósmekkleg.

„Mér finnst að við sem samfélag eigum að vera stíf á því að heimili fólks, sama hvaða starfi það gegnir, séu svolítið friðhelg. Við getum verið ósammála um næstum því allt en ég held að flestir geti verið sammála um það. Mér finnst þetta ekki smekklegt,“ segir Auður.